नायगाव बीडीडी चाळ पुनर्विकास : ८६४ घरांच्या चावी वाटपाला आता जानेवारी अखेरचा मुहूर्त

वरळी, ना. म. जोशी मार्ग आणि वरळी बीडीडी चाळींचा रखडलेला पुनर्विकास मुंबई मंडळाच्या माध्यमातून मार्गी लावण्यात येत आहे. तिन्ही ठिकाणच्या प्रकल्पात पहिल्या टप्प्याअंतर्गत पुनर्वसित इमारतींची बांधकामे सुरू आहेत. वरळीतील ५५६ घरांचे काम पूर्ण करून या घरांचे चावी वाटप ऑक्टोबर २०२५ मध्ये करण्यात आले आहे. उत्तुंग इमारतीमधील ५०० चौरस फुटांच्या घरात राहण्यास जाण्याचे ५५६ बीडीडीवासियांचे स्वप्न पूर्ण झाले. वरळीतील ५५६ घरांच्या चावी वाटपानंतर नोव्हेंबर २०२५ मध्ये नायगावमधील ८६४ घरांचे वाटप करण्याचे जाहीर केले होते. त्यानुसार पाच पुनर्वसित इमारतींची कामे पूर्ण करून चावी वाटपाच्या कार्यक्रमाची तयारीही करण्यात आली.

चावी वाटपासाठी १२ नोव्हेंबर २०२५ हा मुहूर्त निश्चित करून सर्व तयारी करण्यात आली. मात्र अचानक चावी वाटपाचा कार्यक्रम रद्द करण्यात आला आणि त्यानंतर चावी वाटपाचा कार्यक्रम लांबला तो लांबलाच. आधी घरांना निवासी दाखला प्रा्प्त होण्यास विलंब झाल्याने चावी वाटप लांबणीवर पडले. तर निवासी दाखला मिळाल्यानंतर आचारसंहिता लागू झाली आणि चावी वाटपाचा कार्यक्रम लांबणीवर पडला. पण आता पुढील आठवड्यात पालिका निवडणुकीसाठी मतदान आणि त्यानंतर मतमोजणी होणार आहे. त्यामुळे पुढील आठवड्यात आचारसंहिता संपुष्टात येणार आहे. आचारसंहिता संपुष्टात आल्यानंतर नायगावमधील ८६४ घरांचे चावी वाटप करण्याच्यादृष्टीने मुंबई मंडळ पुन्हा एकदा कामाला लागले आहे.

नायगावमधील ८६४ घरांना निवासी दाखला प्राप्त झाला आहे. घरे वितरणासाठी सज्ज आहेत. त्यामुळे आता केवळ आचारसंहिता संपण्याची प्रतीक्षा आहे. आचारसंहिता संपताच घरांचे चावी वाटप करण्याचा निर्णय घेण्यात आला आहे. यासाठी लवकरच मुख्यमंत्र्यांची वेळ घेण्यात येणार आहे. तर जानेवारीअखेरीस चावी वाटपाचा कार्यक्रम घेण्यात येईल, असे मुंबई मंडळातील अधिकाऱ्यांनी सांगितले. जानेवारीअखेरीस चावी वाटप झाल्यास उत्तुंग इमारतीतील ५०० चौरस फुटांच्या घरात राहण्यास जाण्याचे नायगाव बीडीडीवासियांचे स्वप्न पूर्ण होईल.