Air India Europe Canada Flights | एअर इंडियाची युरोप, कॅनडासाठी ३६ अतिरिक्त विमाने; पाहा वेळापत्रक

गेल्या १८ दिवसांपासून इराण-इस्त्रायल युद्ध सुरू असल्याने आखाती देशांनी हवाई निर्बध घातले आहेत. यामुळे विमान वाहतूक पूर्णपणे विस्कळीत झाली आहे.

Air India additional international flights to London Frankfurt Toronto | Air India Europe Canada flight schedule March 2026

इराण-इस्त्रायल युद्धामुळे विस्कळीत झालेल्या आंतरराष्ट्रीय विमान वाहतुकीच्या पार्श्वभूमीवर एअर इंडियाचा ३६ अतिरिक्त विमाने चालवण्याचा निर्णय (संग्रहित छायाचित्र)

मुंबई : इराण-इस्त्रायल युद्धाचा परिणाम संपूर्ण जगावर होत असला तरी आंतरराष्ट्रीय प्रवासाची मागणी कमी झालेली नाही. प्रवाशांच्या मागणीच्या पार्श्वभूमीवर एअर इंडियाने १९ ते २८ मार्चदरम्यान युरोप आणि उत्तर अमेरिकेतील प्रमुख ठिकाणासाठी ३६ अतिरिक्त विमान सेवा चालविण्याचा निर्णय घेतला आहे. यामुळे या मार्गावरील प्रवाशांना मोठा दिलासा मिळणार आहे.

युद्धामुळे हवाई वाहतुकीचे सध्या तीनतेरा वाजले आहेत. गेल्या १८ दिवसांपासून इराण-इस्त्रायल युद्ध सुरू असल्याने आखाती देशांनी हवाई निर्बध घातले आहेत. यामुळे विमान वाहतूक पूर्णपणे विस्कळीत झाली आहे. युरोप आणि उत्तर अमेरिकेसाठी प्रवाशांची मागणी जास्त आहे. त्यामुळे या प्रवाशांच्या सोयीसाठी एअर इंडियाने दिल्ली – लंडन (हीथ्रो), मुंबई – लंडन (हीथ्रो), दिल्ली – फ्रँकफर्ट, दिल्ली – झुरिच, दिल्ली – टोरोंटोदरम्यान विशेष विमान सेवा चालविण्याचा निर्णय घेतला आहे. या अतिरिक्त उड्डाणांमुळे सदर पाच मार्गांवर अतिरिक्त १० हजार ०१२ आसन उपलब्ध होणार आहेत.

एअर इंडियाने यापूर्वी १० ते १८ मार्चदरम्यान नऊ मार्गांवर अतिरिक्त ७८ विमाने चालविली होती. एअर इंडियाची अधिकृत वेबसाइट (www.airindia.com ), मोबाइल ॲप आणि ट्रॅव्हल एजंट्ससह सर्व माध्यमांद्वारे अतिरिक्त विमान सेवांचे आरक्षण टप्प्याटप्प्याने सुरू करण्यात येत आहे.