Ajit Pawar : आमदार विकास निधी’वरील स्वाक्षरी अखेरची…

खासदार विकासनिधीचे वितरण पूर्णत: ऑनलाइन पद्धतीने ई-साक्षी प्रणालीद्वारे करण्यात येते. त्याच धर्तीवर आमदारांसाठीही ई-समर्थ प्रणाली असावी, अशी संकल्पना उपमुख्यमंत्री अजित पवार यांनी मांडली होती. त्यानुसार त्याची संपूर्ण तयारीही त्यांनी केली. पुढील महिन्यात या प्रणालीचे उद्घाटन पुण्यात करण्यात येणार होते. परंतु २८ जानेवारी रोजी विमान अपघातात उपमुख्यमंत्री अजित पवार यांच्यासह पाच जणांचा मृत्यू झाला आणि या प्रणालीच्या उद्घाटनाची इच्छाही अपुरी राहिली.

‘ई-समर्थ प्रणाली’द्वारे पुण्यातील २४ आमदारांना विकास निधीचे वितरण होणार आहे. यामध्ये विधानसभेच्या २१ तर विधान परिषदेच्या तीन आमदारांचा समावेश आहे. पुण्यातून या योजनेला सुरुवात झाल्यानंतर ती संपूर्ण राज्यभरात लागू करण्यात येणार आहे. यापुढे सर्व आमदारांचा विकास निधी हा ई-समर्थ प्रणालीद्वारे होणार आहे. यासाठी आमदारांना ‘ई-लॉगिन आयडी’ देण्यात येणार असून त्यावर ‘लॉगिन’ करून आपल्या विभागातील कामांची शिफारस करता येणार आहे. तसेच कंत्राटदारांनाही झालेल्या कामाचा निधी याप्रणालीमार्फत खात्यावर जमा होणार आहे.

निधी जिल्हाधिकाऱ्यांकडे

आमदार स्थानिक विकास कार्यक्रमांतर्गत २०२५-२६ या आर्थिक वर्षाकरिता २,२०० कोटींची तरतूद करण्यात आली होती. या निधीपैकी ६६० कोटींचा निधी ‘बिम्स’ प्रणालीच्या माध्यमातून आधीच वितरित झाला आहे. त्यापैकी २५०.६२ कोटी रुपये इतका निधी संदर्भाधीन क्र. ३ येथील शासन निर्णयान्वये सर्व जिल्ह्यांना वितरित झालेला आहे.

सद्यस्थितीत वित्त विभागाकडून ९४४.६२ कोटी रुपये इतका निधी वितरणासाठी उपलब्ध झाला आहे. त्यानुसार ‘बिम्स’ प्रणालीवर यापूर्वीचा शिल्लक ४०९.३८ कोटी व वित्त विभागाकडून प्राप्त ९४४.६२ कोटी असा एकूण १३५४.०० कोटी इतका निधी वितरणासाठी उपलब्ध आहे. आमदार स्थानिक विकास कार्यक्रमांतर्गत विधानसभा आणि ५४ विधान परिषद सदस्यांसाठीचा हा निधी त्या-त्या जिल्ह्याच्या जिल्हाधिकाऱ्यांकडे सोपविण्यात आला आहे.