Ajit Pawar NCP Full Candidate List: अजित पवारांच्या राष्ट्रवादीची मुंबई निवडणुकीसाठी पहिली यादी जाहीर; नवाब मलिकांच्या तीन कुटुंबीयांचा समावेश!

कधी होणार महानगर पालिका निवडणुका?

गेल्या पाच वर्षांपासून पुढे ढकलल्या जाणाऱ्या मुंबई महानगर पालिका निवडणुका अखेर पुढच्या महिन्यात होऊ घातल्या आहेत. सर्वोच्च न्यायालयाने दिलेल्या आदेशांनंतर राज्य निवडणूक आयोगाने महाराष्ट्रात स्थानिक स्वराज्य संस्थांच्या निवडणुकांची घोषणा केली. यामध्ये पहिल्या टप्प्यात नगरपरिषद व नगरपंचायत निवडणुका पार पडल्या. या निवडणुकांमध्ये भाजपाप्रणीत महायुतीमधील मित्रपक्षांचा वरचष्मा पाहायला मिळाला. आता पुढच्या महिन्यात १५ जानेवारी रोजी मुंबईसह राज्यभरातल्या २९ महानगर पालिकांसाठी मतदान पार पडणार असून १६ जानेवारी रोजी मतमोजणी होऊन निकाल जाहीर केले जाणार आहेत.

बावनकुळे म्हणतात, भाजपाचा मलिकांना विरोध नाही!

दरम्यान, नवाब मलिक यांच्यामुळेच भाजपा व राष्ट्रवादी काँग्रेस यांच्यात मुंबई महानगर पालिका निवडणुकीसाठी युती होऊ शकलेली नसल्याचं स्पष्ट झालं होतं. भाजपाच्या काही नेत्यांनी जाहीरपणे नवाब मलिक यांच्या मुंबईतील नेतृत्वाला विरोधही केला होता. मात्र, आता भाजपा नेते चंद्रशेखर बावनकुळे यांनी नवाब मलिकांच्या नेतृत्वाला भाजपाचा विरोध नसल्याचं ‘लोकसत्ता’शी बोलताना नमूद केलं आहे. “नवाब मलिक यांच्यावर आरोप आहेत, पण ते सिद्ध झाले नाहीत. मुंबईत राष्ट्रवादीशी युती करायची नाही हे पूर्वीच दोन्ही पक्षाच्या नेत्यांच्या बैठकीत ठरले आहे”, असं बावनकुळे यांनी म्हटलं आहे.

अजित पवारांच्या राष्ट्रवादी काँग्रेसची मुंबईसाठीची उमेदवार यादी!

नवाब मलिकांच्या कुटुंबात तिघांना उमेदवारी

“२०१७ ला १६५ मधून मी उमेदवार होते. माझ्या आत्या सईदा खान व माझे काका कप्तान मलिक हेही उमेदवार होते. आता त्या दोघांची उमेदवारी पुन्हा दिली जात असून कप्तान यांच्या सून बुशरा मलिक यांना उमेदवारी देण्यात आली आहे”, अशी माहिती नवाब मलिक यांच्या कन्या सना मलिक यांनी दिली आहे. “मुंबईत स्वबळावर निवडणूक लढण्यासंदर्भात आमच्याशी बोलणं झालं आहे. पण त्यासंदर्भात अंतिम निर्णय झाल्यास आमच्या कुटुंबातून हे तिघे मुंबई महानगर पालिका निवडणूक लढवतील”, असंही त्यांनी नमूद केलं.