मुंबई : आयफोनचे आकर्षण लक्षात घेऊन भारतात शुक्रवारी ‘अ‍ॅपल आयफोन १५’ या मालिकेतील मोबाइल विक्रीसाठी उपलब्ध करण्यात आले. कंपनीच्या बीकेसी येथील दुकानाबाहेर या मोबाइलच्या खरेदीसाठी अ‍ॅपलप्रेमींची झुंबड उडाली होती. विशेष म्हणजे महाराष्ट्रातूनच नव्हे, तर परराज्यांतूनही ग्राहक खरेदीसाठी मुंबईत आले होते.
हेही वाचा >>> iPhone 15 खरेदी करण्याचा विचार करताय? ‘या’ ठिकाणी सुरू आहेत बेस्ट ऑफर्स; एकदा पाहाच
भारतात विक्रीसाठी उपलब्ध झालेल्या ‘आयफोन १५’च्या मालिकेमध्ये चार मॉडेलचा समावेश आहे. ‘आयफोन १५’, ‘आयफोन १५ प्लस’, ‘आयफोन १५ प्रो’ आणि ‘आयफोन १५ प्रो मॅक्स’ यांचा त्यामध्ये समावेश आहे. अ‍ॅपल कंपनीने गुलाबी, पिवळय़ा, हिरव्या, निळय़ा आणि काळय़ा रंगात हे मोबाइल विक्रीसाठी उपलब्ध केले आहेत.
हेही वाचा >>> VIDEO: भारतात लॉन्च झाला विवोचा ‘हा’ स्मार्टफोन; २ हजारांचा इन्स्टंट डिस्काउंट आणि…, फीचर्स एकदा बघाच
‘आयफोन १५’ची किंमत ७९ हजारांपासून १ लाख ५९ हजार ९०० रुपयांदरम्यान आहे. ग्राहकांना ‘आयफोन १५ प्लस’साठी ८९ हजार रुपये, ‘आयफोन १५ प्रो’साठी १ लाख ३४ हजार ९०० रुपये द्यावे लागणार आहेत. ‘आयफोन प्रो’ आणि ‘आयफोन १५ प्रो मॅक्स’ अ‍ॅपलचे आतापर्यंतचे वजनाने सर्वात हलके ‘मॉडेल’ आहेत. ‘आयफोन १५’ सीरिजचे हे फोन १२८ जीबी, १५६ जीबी, ५१२ जीबी आणि १ टीबी साठवण क्षमतेत उपलब्ध आहेत. बीकेसीच्या दुकानात अहमदाबादवरून खास अ‍ॅपल मोबाइलच्या खरेदीसाठी मुंबईला आलेला तरुण चक्क सतरा तासांपासून रांगेत उभा होता. इतकेच नव्हे, तर एका तरुणाने आयफोन १५ खरेदीसाठी बंगळूरुवरून विमानाने प्रवास करत मुंबई गाठली. तसेच अभिनेता रणवीर सिंग यानेही शुक्रवारी बीकेसीतील दुकानाला भेट दिली.
