पाच अभ्यासक्रमांच्या प्रवेशास आरंभ मुंबई : तरुणाईच्या तंत्रकौशल्याला वाव देण्यासाठी मुंबईत स्थापन करण्यात आलेल्या ‘अॅटलस’ या महाराष्ट्रातील पहिल्या तंत्रकौशल्य विद्यापीठाच्या (स्किलटेक युनिव्हर्सिटी) सल्लागार मंडळाची बैठक बुधवार, २६ जानेवारी रोजी घेण्यात आली. गेल्या वर्षी १५ ऑगस्ट रोजी या विद्यापीठाची स्थापना करण्यात आली. ‘यूटीव्ही’चे व्यवस्थापकीय संचालक रॉनी स्क्रूवाला आणि डॉ. इंदू सहानी यांनी या विद्यापीठाची स्थापना केली आहे. राष्ट्रीय शिक्षण धोरणाला अनुसरून ‘अॅटलस’ने जागतिक दर्जाचे शैक्षणिक आणि आकलनदृष्टय़ा महत्त्वाच्या पाच अभ्यासक्रमांची निर्मिती केली आहे. व्यवस्थापन, कला, माध्यम आणि उद्यमशीलता आदी विषयांवरील अभ्यासक्रमांसाठी गेल्या वर्षी ऑगस्टमध्ये पहिल्या तुकडीने प्रवेश घेतला. या वर्षांची प्रवेश प्रक्रिया सुरू झाली असून विद्यार्थ्यांचा त्याला भरघोस प्रतिसाद मिळत आहे. या तंत्रकौशल्य विद्यापीठास पुढील चार वर्षांत एक प्रमुख शैक्षणिक संस्था बनवण्यासाठी काय करता येईल, याबाबत संस्थेच्या सल्लागार मंडळाच्या बैठकीत चर्चा करण्यात आली. त्यासाठी दृष्टिकोन, मानक प्रणाली आणि ध्येय ठरवण्यात आले. संस्थेच्या सल्लागार मंडळात उद्योग आणि शिक्षण क्षेत्रांतील मातब्बर व्यक्तींचा समावेश आहे. संस्थेच्या कार्यकारी अध्यक्षपदी संस्थापक असलेल्या डॉ. इंदू सहानी असून दीपक पारेख (एचडीएफसी), रॉनी स्क्रूवाला व मयांक कुमार (अपग्रॅड), राम राघवन (कोलगेट), केशव मुर्गेश (डब्ल्यूएनएस), करण सिंग (बैन), विवेक पंडीत (मॅककिन्से), जमिल खत्री (केपीएमजी), अनंत गोएंका (सीएट), अंजली बन्सल (अवना), आर्यमन बिर्ला (आदित्य बिर्ला ग्रुप), संजय गुर्बक्सनी (मोंडेलेझ), प्रा, रूस विन्टर (एनवाययू- स्टेर्न), प्रा. टीम मार्शल (आरएमआयटी), कारोल किम (परसन्स) यांचा सल्लागार मंडळात समावेश आहे. या विद्यापीठासाठी अपग्रॅडने ना नफा ना तोटा तत्त्वावर १५० कोटी रुपये उपलब्ध करून दिले आहे. नोकऱ्यांचे विविध पर्याय.. ‘अॅटलस’मध्ये सध्या १५० प्राध्यापक असून पुढील १८ महिन्यांत ही संख्या दुप्पट होणार आहे. ४०० पेक्षा अधिक शैक्षणिक संस्था आणि शाळा त्यांच्या विद्यार्थ्यांना ‘अॅटलस’चा संदर्भ देत असून २५० औद्योगिक संस्था नोकर भरतीसाठी (प्लेसमेंटसाठी) ‘अॅटलस’कडे येत आहेत. येथील अभ्यासक्रम पूर्ण झाल्यानंतर विद्यार्थ्यांना नोकरीसाठी अनेक पर्याय उपलब्ध असणार आहेत. येत्या काही वर्षांत देशातील सर्वोत्तम पहिल्या पाच विद्यापीठांत ‘अॅटलस’चे नाव असेल हे आमचे ध्येय असून जागतिक दर्जाचे शैक्षणिक केंद्र तयार करण्यासाठी आम्ही प्रयत्नशील आहोत. देशातील तरुणांच्या कौशल्याला वाव देणे आणि त्यांचे व्यावसायिक भवितव्य घडविण्यासाठी आम्ही वचनबद्ध आहोत. भारताने चौथ्या औद्योगिक क्रांतीचे नेतृत्व करावे, जिथे नवसंकल्पना आणि सजर्नशीलता कामगार लवादाप्रमाणे नसेल, तर तो या क्रांतीचा गाभा असेल. - रॉनी स्क्रूवाला, संस्थापक आणि अध्यक्ष अपग्रॅड