मुंबईः भांडुप परिसरातील बहुमजली इमारतीच्या ३१ व्या मजल्यावरून पडून १५ वर्षांच्या मुलीचा २३ जून रोजी मृत्यू झाला होता. या मुलीने अभ्यासाच्या ताणामुळे आत्महत्या केल्याचे तिच्या मित्राने पोलिसांना सांगितले होते. प्रत्यक्षात या मुलीला मित्रानेच धक्का दिल्याचे पोलीस तपासात निष्पन्न झाले आहे. याप्रकरणी भांडुप पोलीस हत्येचा गुन्हा दाखल करणार असून त्याबाबत कायदेशीर प्रक्रिया सुरू असल्याचे अधिकाऱ्यांनी सांगितले.
मृत मुलगी मुलुंड येथे कुटुंबियासह राहत होती. भांडुपमधील एल. बी. एस. मर्गावरील एका इमारतीत राहणाऱ्या १६ वर्षांच्या मित्राला भेटण्यासाठी मंगळवारी सायंकाळी ती गेली होती. अभ्यासाच्या तणावामुळे तिला नैराश्य आले होते. मित्राने तिची समजूत घातल्यानंतर दोघेही खाली उतरत असताना अचानक तिने ३१ व्या मजक्यावरून खाली उडी मारली, अशी माहिती तिच्या मित्राने दिली होती. पण तपासात तिला मित्रानेच धक्का दिल्याचे निष्पन्न झाले आहे.
घटनेनंतर स्थानिक रहिवाशांनी तत्काळ तिला पालिकेच्या अगरवाल रुग्णालयात नेले. मात्र उपचारापूर्वीच तिचा मृत्यू झाल्याचे डॉक्टरांनी जाहीर केले. घटनेची माहिती मिळताच भांडुप पोलीस तत्काळ घटनास्थळी पोहोचले. याप्रकरणी अपमृत्युची नोंद करण्यात आली होती व प्रकरणाचा पोलिसांकडून सर्व बाजूंनी तपास सुरू होता. त्यावेळी घटनेच्या दिवशी दोघांमध्ये वाद झाला. त्यावेळी रागात मित्रानेच मुलीला धक्का दिल्याचे निष्पन्न झाले. त्यामुळे, याप्रकरणी मुलाविरोधात हत्येचा गुन्हा दाखल करणार आहोत, असे एका अधिकाऱ्याने सांगितले. आरोपी मुलगाही अल्पवयीन आहे.
