BMC Budget 2026-27 Updates: मुंबई मनपा ८१ हजार कोटींपैकी ३६ हजार कोटी रुपयांच्या ठेवी मोडणार; कारण काय?

देशातील सर्वांत श्रीमंत महानगरपालिका अशी ख्याती असलेल्या मुंबई महानगरपालिकेचा २०२६-२७ या आर्थिक वर्षांचा तब्बल ८० हजार ९५२ कोटींचा अर्थसंकल्प पालिका आयुक्त प्रशासक भूषण गगराणी यांनी मंगळवारी स्थायी समितीला सादर केला.

मुंबई मनपाच्या अर्थसंकल्पात उत्पन्नाचे प्रमुख पाच स्रोत आहेत. जकात हा पालिकेचा सर्वात मोठा उत्पन्नाचा स्रोत होता मात्र जकात बंद झाल्यापासून पालिकेला दरमहा राज्य सरकारकडून जीएसटी नुकसान भरपाई मिळते. त्याखालोखाल दुसरा स्रोत म्हणजे मालमत्ता कर. पालिकेच्या ८० हजार कोटींच्या ठेवी असून त्यावरून व्याजातूनही पालिकेला उत्पन्न मिळत असते. तर राज्य सरकारकडे थकीत असलेली येणी देखील उत्पन्न म्हणून ग्राह्य धरली जातात. त्याव्यतिरिक्त पालिकेच्या मालमत्तांमधूनही भाडे, अधिमूल्य, मक्ता भूभाडे, पालिकेच्या मालकीच्या जमिनीवरील पुनर्विकासापोटीचे अधिमूल्य यातूनही महसूल मिळत असतो.

चालू आर्थिक वर्षात मुंबई महापालिका प्रशासनाने ७४,४२७ कोटींचा अर्थसंकल्प सादर केला होता. आधीच्या वर्षी ६५,१८० कोटींचा अर्थसंकल्प सादर करण्यात आला होता. त्यामुळे चालू अर्थसंकल्पात १४.१९ टक्के वाढ झाली होती. यंदाही अर्थसंकल्पाचे आकारमान वाढणार असल्याची चर्चा आहे.

मुंबई महापालिकेचा अर्थसंकल्प हा ५ फेब्रुवारीच्या आत सादर करावा असा नियम असला तरी यंदा महापालिका निवडणूक तोपर्यंत पार पडलेली होती व सत्तास्थापनेच्या प्रक्रियेमुळे अर्थसंकल्प वीस दिवस उशीराने सादर होणार आहे.