मुंबई महानगरपालिकेच्या आयसीयूच्या निविदावर संशयाचे सावट; अत्यल्प दरात डॉक्टरांच्या सेवेबाबत प्रश्नचिन्ह उपस्थित

मुंबई महापालिकेच्या १२ उपनगरीय रुग्णालयांतील आयसीयू निविदेत अत्यल्प दर सादर झाल्याने वाद निर्माण झाला आहे. या दरात डॉक्टरांचे वेतन व दर्जेदार सेवा शक्य नसल्याचा आरोप करत संघटनांनी तीव्र आक्षेप नोंदवला आहे.

Written by लोकसत्ता टीम

मुंबई

Updated: January 29, 2026 22:35 IST

bmc-icu-tender-controversy-doctor-salary-concern

महापालिका आयसीयू निविदेतील कमी दरांमुळे डॉक्टर सेवांवर प्रश्नचिन्ह (संग्रहित छायाचित्र)

मुंबई : मुंबई महानगरपालिकेकडून १२ उपनगरीय रुग्णालयांमधील अतिदक्षता विभागातील १५३ खाटांसाठी निविदा प्रक्रिया राबविण्यात येत आहे. अनेक महिन्यांपासून रखडलेली ही निविदा प्रक्रिया आता अंतिम टप्प्यात आली आहे. मात्र कंत्राटदारांनी निविदेमध्ये दिलेल्या अत्यल्प दरामुळे ही निविदा वादाच्या भोवऱ्यात सापडली आहे. निविदा प्रक्रियेतील अटी व सादर करण्यात आलेल्या अत्यल्प दरामुळे डॉक्टरांचे वेतन, इतर खर्च व सेवा देणे अशक्य असल्याचे मत व्यक्त करण्यात येत आहे. तसेच रुग्णांना कमी दर्जाची रुग्णसेवा मिळण्याची शक्यता वर्तविण्यात येत आहे.

डॉक्टरांची कमतरता असल्याचे कारण देत मुंबई महानगरपालिकेने १२ उपनगरीय रुग्णालयांमध्ये अतिदक्षता विभाग हे कंत्राटी पद्धतीने राबविण्याचा निर्णय घेतला आहे. त्यानुसार काढण्यात आलेल्या निविदेमध्ये पात्र ठरणाऱ्या संबंधित खासगी संस्थेला प्रत्येक आयसीयूसाठी तीन शिफ्टमध्ये प्रत्येकी एक एमबीबीएस डॉक्टर व एक पदव्युत्तर डॉक्टर असे सहा डॉक्टर आणि एक पदव्युत्तर सल्लागार डॉक्टर तसेच सुट्या व रजा व्यवस्थापनासाठी १ अतिरिक्त एमबीबीएस व १ अतिरिक्त पदव्युत्तर डॉक्टर ठेवणे बंधनकारक आहे. त्यामुळे एका आयसीयूसाठी एकूण ९ डॉक्टरांची सेवा अपेक्षित आहे. या निविदा प्रक्रियेत श्री गणेश मल्टीस्पेशालिटी हॉस्पिटल अँड रिसर्च सेंटर, ट्रायडंट रुग्णालय आणि व्हीएएमसी रुग्णालय या संस्थांचा समावेश आहे.

सांताक्रूझ येथील व्ही. एन. देसाई, गोवंडी शताब्दी, बर्वे नगरमधील मुक्ताबाई, विक्रोळीतील के. एम. जे. फुले रुग्णालय आणि मुलुंडमधील एम. टी. अग्रवाल येथील प्रत्येकी १० आयसीयू खाटांसाठी ट्रायडंट रुग्णालयाने महिन्याला ३ लाख रुपये सर्वात कमी दर दिला. कांदिवलीतील शताब्दी रुग्णालयातील ३० खाटांसाठी २६ हजार ५०० रुपये म्हणजे प्रतिमहा ७ लाख ९५ हजार इतका दर दिला. बोरिवलीतील सावित्रीबाई फुले रुग्णालय, मालाडमधील एम. डब्ल्यू. देसाई आणि बोरिवलीतील भगवती रुग्णालयासाठी श्री गणेश मल्टीस्पेशालिटी रुग्णालयाने १ लाख ३२ हजार रुपये दर दिला. हा दर डॉक्टरांच्या वेतनाशी सुसंगत नसल्याने कंत्राटदाराकडून डॉक्टरला वेतन देणे अशक्य असल्याचे मत व्यक्त केले जाते आहे.

हेही वाचा

लोकलमध्ये अनधिकृत जाहिराती लावणाऱ्या टोळीची धरपकड; ४२ हजार अनधिकृत जाहिरातीचे पोस्टर जप्त, पश्चिम रेल्वेच्या आरपीएफची कारवाई

२४ फेब्रुवारी २०१५ रोजीच्या निर्णयानुसार प्रत्येक व्यक्तीला त्याच्या पदानुसार वेतन देणे गरजेचे आहे. डॉक्टरांचे किमान वेतन हे एक लाखांपेक्षा अधिक असते. मात्र पालिकेच्या नियमानुसार ९ डॉक्टरांची नियुक्ती केल्यास त्यांना किमान ५० हजार वेतन देणे ही कंत्राटदाराला शक्य होणार नाही. त्यामुळे अतिदक्षता विभागातील रुग्णांना मिळणाऱ्या सेवेबाबत प्रश्नचिन्ह निर्माण झाले आहेत. महानगरपालिका नागरिकांकडून कर रुपात पैसे घेते. त्यामुळे त्यांना उत्तम सेवा देणे गरजेचे आहे. अशाप्रकारे खासगीकरण करून रुग्णांच्या जीवाशी खेळू शकत नाही. – प्रदीप नारकर, सहाय्यक सरचिटणीस, म्युनिसिपल मजदूर युनियन

मुंबई महानगरपालिकेच्या रुग्णालयातील प्रयोगशाळा तंत्रज्ञाला किमान ३० हजार रुपये, तर प्राथमिक केंद्रावरील डॉक्टरला प्रशासनाकडून किमान ७० ते ८० हजार रुपये वेतन दिले जाते. मात्र या निविदा प्रक्रियेमुळे पदवी व पदव्युत्तर डॉक्टरांना ५० हजारांपेक्षा कमी वेतन मिळणार आहे. त्यामुळे या डॉक्टरांकडून कोणत्या प्रकारची सुविधा मिळणार आहे याबाबत प्रश्न निर्माण झाले असून, महानगरपालिका सर्वसामान्य रुग्णांच्या आरोग्याशी खेळत आहे. – अशोक शेजुळे, अध्यक्ष मुंबई म्युनिसिपल ऑफिसर्स ॲण्ड डॉक्टर्स असोसिएशन