वायू प्रदूषण नियमांचे उल्लंघन आढळल्यास बुलेट ट्रेन व उच्च न्यायालय संकुलाचे काम बंद; पालिकेचा इशारा

या पार्श्वभूमीवर अखेर आता पालिकेने कठोर कारवाई करण्याचा निर्णय घेतला आहे. त्यानुसार बीकेसीतील बुलेट ट्रेन स्थानकाच्या कामाची आणि उच्च न्यालायाच्या संकुलासाठीच्या पाडकामाची पालिकेच्या पथकाकडून बुधवारी पाहणी करण्यात येणार आहे. यावेळी या ठिकाणी सुधारणा करण्यात आल्याचे न आढळल्यास या दोन्ही प्रकल्पांना तात्काळ काम बंद नोटीसा देण्याचा निर्णय पालिकेने घेतला आहे. त्यामुळे वायू प्रदूषणाचे उल्लंघन झाल्याचे आढळल्यास या दोन्ही प्रकल्पांचे काम बंद होण्याची शक्यता आहे.

गेली काही दिवसांपासून मुंबईतील हवेची गुणवत्ता ढासळली असून त्याचा परिणाम नागरिकांच्या आरोग्यावर होत आहे. या पार्श्वभूमीवर पालिकेने वायू प्रदूषण नियंत्रण नियमावली तयार केली असून या नियमावलीचे उल्लंघन करणाऱ्या विकासकांविरोधात, पायाभूत सुविधा प्रकल्पांविरोधात कठोर कारवाई करण्यास सुरुवात केली आहे. त्यानुसार प्रकल्पस्थळांची पाहणी करून पालिकेकडून सुरुवातीला कारणे दाखवा नोटीसा बाजवल्या जातात, त्यानंतर सुधारणा न झाल्यास काम बंद नोटीस पाठवून काम बंद केले जाते.

पालिकेच्या पाहणीत बुलेट ट्रेनच्या बीकेसीतील स्थानकाच्या कामात, मेट्रो २ ब (अंधेरी पश्चिम – मंडाले,मानखुर्द) मार्गिकेच्या कामात आणि उच्च न्यायालय संकुलासाठीच्या इमारत पाडकामात वायू प्रदूषण नियंत्रण नियमावलीचे उल्लंघन होत असल्याचे निदर्शनास आले आहे. त्यानंतर या तिन्ही प्रकल्पांना कारणे दाखवा नोटीसा बजावण्यात आल्या आहेत. उच्च न्यायलायानेही या प्रकल्पांच्या कामादरम्यान होणाऱ्या वायू प्रदूषणासंबंधीच्या कारवाईबाबत पालिकेकडे विचारणा केली होती. तर मंगळवारीही न्यायालयाने पालिकेच्या भूमिकेवर ताशेरे ओढले.

आता पालिकेने कारणे दाखवा नोटीशीनुसार प्रकल्पस्थळी सुधारणा करण्यात आल्या आहेत की नाही याची पाहणी करून सुधारणा न कारणाऱ्या प्रकल्पाविरोधात काम बंदची कारवाई करण्याचा निर्णय घेतला आहे. त्यानुसार बुधवारी बीकेसीतील बुलेट ट्रेन आणि उच्च न्यायालय संकुलाच्या कामाची पाहणी पालिकेच्या पथकाकडून केली जाणार असल्याची माहिती पालिकेतील उच्चपदस्थ अधिकाऱ्यांनी ‘लोकसत्ता’ला दिली.

या पाहणीदरम्यान वायू प्रदूषण नियंत्रण नियमावलीच्या दृष्टीने आवश्यक त्या सुधारणा न झाल्याचे निदर्शनास आल्यास काम बंद नोटीस बजावली जाणार असल्याचेही अधिकाऱ्यांनी सांगितले. त्यामुळे पालिकेच्या बुधवारच्या पाहणीकडे लक्ष लागले आहे. दरम्यान, मेट्रो २ ब मार्गिकेतील बीकेसीतील कामादरम्यान वायू प्रदूषण नियमावलीचे उल्लंघन होत असल्याप्रकरणी कंत्राटदाराला कारणे दाखवा नोटीस पालिकेकडून बजावण्यात आली आहे. या प्रकल्पातही सुधारणा न झाल्यास या प्रकल्पाविरोधातही काम बंदची कारवाई केली जाण्याची शक्यता असल्याचे सूत्रांनी सांगितले.