सीबीएसईची दहावी, बारावीच्य परीक्षा १७ फेब्रुवारीपासून अफवा आणि बनावट प्रश्नपत्रिकांपासून सावध राहण्याचे आवाहन

सीबीएसईच्या दहावीच्या परीक्षेसाठी २५ लाख ८ हजार ३१९ विद्यार्थ्यांनी नोंदणी केली आहे. त्यात १४ लाख ८ हजार ५४६ मुले आणि १० लाख ९९ हजार ७७३ मुली आहेत. बारावीसाठी १८ लाख ५९ हजार ५५१ विद्यार्थी परीक्षेला बसणार आहेत. त्यात १० लाख २७ हजार ५५२ मुले व ८ लाख ३१ हजार ९९९ मुलींचा समावेश आहे. दोन्ही स्तरांवर मुलींची लक्षणीय उपस्थिती कायम असल्याचे या आकडेवारीवरून दिसून येते. परीक्षेच्या सुरळीत व पारदर्शक आयोजनासाठी देशभरात दहावीसाठी ८ हजार ७५ तर बारावीसाठी ७ हजार ५७४ परीक्षा केंद्रे निश्चित करण्यात आली आहेत. दहावीची ८३ विषयांची, तर बारावीची १२० विषयांची परीक्षा घेतली जाणार आहे.

सीबीएसईने दिलेल्या सूचनेनुसार परीक्षेदरम्यान प्रश्नपत्रिका फुटल्याच्या खोट्या बातम्या, बनावट प्रश्नपत्रिका आणि चुकीची माहिती सोशल मीडियावर पसरवली जाते. अशा अप्रमाणित माहितीवर विश्वास ठेवणे, ती पुढे पाठवणे किंवा त्यात सहभाग घेणे, यामुळे विद्यार्थ्यांमध्ये अनावश्यक ताण आणि गोंधळ निर्माण होतो. विशेषतः परीक्षेच्या महत्त्वाच्या टप्प्यावर विद्यार्थ्यांच्या तयारीवर त्याचा नकारात्मक परिणाम होऊ शकतो. त्यामुळे सर्व पालक, विद्यार्थी, शाळा आणि संबंधित घटकांना सतर्क राहण्याचे आणि केवळ अधिकृत माहितीवरच विश्वास ठेवण्याचे आवाहन सीबीएसई मंडळाने केले आहे. दरवर्षीप्रमाणे यंदाही परीक्षा सुरक्षित, पारदर्शक आणि सुरळीत पार पाडण्यासाठी कडक उपाययोजना करण्यात आल्या आहेत.

परीक्षा प्रक्रियेत अडथळा आणण्याचा किंवा चुकीची माहिती पसरवण्याचा कोणताही प्रयत्न संबंधित नियमांनुसार कठोर कारवाई करून हाताळला जाईल, असा इशाराही मंडळाने दिला आहे. अधिकृत माहिती, स्पष्टीकरण किंवा अद्ययावत सूचनांसाठी संबंधितांनी सीबीएसईच्या अधिकृत संकेतस्थळावर माहिती पाहावी तसेच प्रादेशिक कार्यालय किंवा मुख्यालयाशी संपर्क साधावा, असेही सांगण्यात आले आहे. मंडळाच्या परीक्षांबाबतची सर्व अधिकृत माहिती केवळ सीबीएसईच्या माध्यमांवरूनच स्वीकारावी, जेणेकरून चुकीची माहिती पसरू नये आणि व्यापक सार्वजनिक हित जपले जाईल, असे आवाहन करण्यात आले आहे.

परीक्षा आकडेवारी

घटक—–दहावी——बारावी

एकूण विद्यार्थी—–२५०८३१९—–१८५९५५१

एकूण विषय—–८३—–१२०

एकूण केंद्रे—–८०७५—–७५७४

मुले—–१४०८५४६—–१०२७५५२

मुली—–१०९९७७३—-८३१९९९