‘हाऊस अरेस्ट’च्या एजाज खानवर आणखी एक गुन्हा; स्पर्धक अभिनेत्रीवर बलात्काराचा आरोप

एजाज खान हा अभिनेता असून सलमान खान निवेदक असलेल्या बिग बॉसच्या सातव्या पर्वातून तो चर्चेत आला होता. सध्या वादात सापडलेल्या ‘हाऊस अरेस्ट’ या ‘उल्लू’ ॲपवरली कार्यक्रमाचा तो निवेदक (होस्ट) आहे. त्या कार्यक्रमातून अश्लीलता पसरविण्याचा त्याच्यावर आरोप आहे. महिला स्पर्धकांशी अश्लील संभाषण करणे, अश्लील कृत्य करायला भाग पडणे आदी कारणांमुळे तो वादात सापडला होता.

याप्रकरणी बजरंग दलाच्या तक्रारीवरून एजाज खान आणि कार्यक्रमाचे दिग्दर्शक आणि निर्मात्यांविरोधात भारतीय न्याय संहितेच्या कलम २९६, ३(५), माहिती तंत्रज्ञान अधिनियमाच्या कलम ६७ (अ), स्त्रियांचे असभ्य प्रतिरूपण (प्रतिषेध) अधिनियम १९८६ च्या कलम ४, ६ आणि ७ अन्वये गुन्हे दाखल करण्यात आले आहेत.

हाच एजाज खान आता बलात्काराच्या आरोपांमुळे पुन्हा वादात सापडला आहे. ‘हाऊस अरेस्ट’ या कार्यक्रमातील एका ३० वर्षीय स्पर्धक अभिनेत्रीने लग्नाचे आमिष दाखवून बलात्कार केल्याचा आरोप त्याच्यावर केला आहे. तक्रारदार अभिनेत्री मूळची गुजराथची असून कांदिवली येथे राहते. उल्लू ॲपचे मालक विभू अग्रवाल यांनी हाऊस अरेस्ट या मालिकेची निर्मिती केली होती.

या मालिकेचे हाऊस अरेस्ट हे शिर्षक या तक्रारदार अभिनेत्रीने सुचवले होते. त्यामुळे या अभिनेत्रीला या कार्यक्रमात सहभागी होण्याची संधी देण्यात आली होती. ती १७ मार्च २०२५ रोजी मढ येथे झालेल्या चित्रिकरणात ती सहभागी झाली होती. मात्र कार्यक्रमातील बिभत्सपणा आणि अश्लील कृत्यामुळे ती कार्यक्रमातून बाहेर पडली होती.

या तक्रारदार अभिनेत्रीने दिलेल्या फिर्यादीनुसार २४ मार्च रोजी कार्यक्रमाती अंतिम फेरी असल्याने तिला मालाडच्या मढ येथे बोलावण्यात आले. त्यावेळी झालेल्या पार्टीत एझाज खान याने मिठी मारून ‘आय वॉन्ट यू’ असे सांगितले आणि त्याचा मोबाईल नंबर दिला. त्यानंतर अभिनेत्रीला संपर्क साधण्यास सुरवात केली. आमच्या धर्मात ४ लग्ने होतात. मी तुझ्यासाठी लग्न करायला तयार आहे असेही त्याने सांगितल्याचे अभिनेत्रीने तक्रारीत नमूद केले आहे.

खान २५ मार्च रोजी अभिनेत्रीच्या मालाड येथील घरी आला. त्याने वेगवेगळ्या मालिका, वेबसिरीज आणि रिॲलिटी शोज मध्ये काम देण्याचे आश्वासन दिले आणि तिला लग्नाचे आमिष दाखवून बलात्कार केला. अभिनेत्रीवर लहान बहिणीच्या लग्नाची जबाबदारी आहे. ती जबाबदारी त्याने स्विकारल्याचे सांगून तिचा विश्वास संपादन केला. त्यानंतर पुन्हा ४ एप्रिल रोजी अंधेरीच्या एसव्ही रोड येथील लोढा बेल या त्याच्या घरी तक्रारदार अभिनेत्रीला बोलावून पुन्हा तिच्याशी शरीरसंबंध प्रस्थापित केले.

मात्र नंतर तो तिला टाळू लागला. त्यामुळे आपली फसवणूक झाल्याचे लक्षात आल्यानंतर अभिनेत्रीने चारकोप पोलीस ठाण्यात एझाज खान विरोधात तक्रार दाखल केली. या तक्रारीवरून चारकोप पोलिसांनी त्याच्याविरोधात भारतीय न्याय संहितेच्या कलम ६४, ६४ (२) ६९ आणि ७४ अन्वये गुन्हा दाखल केला आहे. सध्या तो फरार आहे.

अंबोली पोलिसांकडून समन्स

हाऊस अरेस्ट या रिॲलिटी कार्यक्रमात अश्लील कृत्य केल्याप्रकरणी निवेदक एझाज खान आणि निर्माता दिग्दर्शकांविरोधात अंबोली पोलीस ठाण्यात गुन्हा दाखल करण्यात आला आहे. पोलिसांनी सोमवारी त्या सर्वांना चौकशीसाठी हजर राहण्यासाठी समन्स बजावले आहे.