दहीहंडी उत्सवातील १.६० लाख गोविंदांना विमासंरक्षण; अपघाती मृत्यू, अपंगत्व आल्यास १० लाखांची मदत

दहीहंडीत सहभागी होऊन मानवी मनोरे रचण्याच्या क्रीडा प्रकाराला साहसी खेळाचा दर्जा राज्य सरकारकडून देण्यात आला आहे. या पार्श्वभूमीवर दरवर्षी राज्यातील गोविंदांचा विमा उतरवला जातो. मागील वर्षी १लाख ५० हजार गोविंदांना विमा संरक्षण देण्यात आले होते. गोविंदापथकांची वाढती संख्या लक्षात घेऊन यंदा आणखी १० हजार गोविंदांना विमा संरक्षण देण्यात आले आहे. मनोरे रचताना अपघाती मृत्यू, कायमस्वरूपी अपंगत्व तसेच उपचार खर्चासाठी आर्थिक संरक्षण देण्यासंदर्भातील शासन निर्णय क्रीडा विभागाने गुरुवारी काढला. यानुसार मानवी मनोरे रचताना अपघाती मृत्यू झाल्यास किंवा कायमस्वरूपी पूर्ण अपंगत्व आल्यास १० लाख रुपयांची मदत केली जाणार आहे. दोन्ही हात, दोन्ही पाय किंवा दोन्ही डोळ्यांचे नुकसान झाल्यासही १० लाख रुपयांची मदत तसेच एक हात, एक पाय अथवा एक डोळा गमावल्यास ५ लाख रुपयांचे विमा संरक्षण देण्यात आले आहे. अंशतः कायमस्वरूपी अपंगत्वासाठी १० लाखांची मदत केली जाणार आहे. अपघातानंतरच्या रुग्णालयीन उपचारांसाठी प्रत्यक्ष खर्च किंवा कमाल १ लाख रुपये देण्यात येणार आहेत.

विमा योजनेसाठी प्रति गोविंदा ७५ रुपये किंवा त्यापेक्षा कमी प्रीमियम असलेल्या शासकीय विमा कंपनीची निवड करण्याचे निर्देश आयुक्त, क्रीडा व युवक सेवा यांना देण्यात आले आहेत. विमा कंपनी निश्चित झाल्यानंतर आवश्यक निधी उपलब्ध करून दिला जाणार असून या योजनेचा खर्च राज्य क्रीडा विकास निधीतून करण्यात येणार आहे. या योजनेचा लाभ केवळ नोंदणीकृत गोविंदांनाच मिळणार आहे. सराव केलेले, निर्धारित वयोमर्यादा पूर्ण केलेले आणि प्रत्यक्ष दहीहंडी उत्सवात सहभागी होणाऱ्या गोविंदांची नोंदणी व पडताळणी महाराष्ट्र राज्य गोविंदा असोसिएशन करणार असून, त्यानंतरच विमा संरक्षण लागू होईल.

दरम्यान, आयोजक संस्थांना स्थानिक प्रशासनाच्या आवश्यक परवानग्या घेणे, न्यायालय व शासनाच्या सर्व सूचनांचे पालन करणे आणि सहभागी गोविंदांच्या सुरक्षिततेसाठी आवश्यक उपाययोजना करणे बंधनकारक करण्यात आले आहे. अपघात झाल्यास तातडीने वैद्यकीय मदत उपलब्ध करून देण्याबरोबरच संबंधित प्रशासन, पोलिस आणि गोविंदा असोसिएशनला त्याची माहिती देणेही आवश्यक राहणार आहे.