मुंबई : देवनार कत्तलखान्याच्या नूतनीकरणासाठी काढलेली निविदा एका आंतरराष्ट्रीय कंपनीच्या फायद्यासाठी असून ती तातडीने रद्द करून नव्याने काढावी, अशी मागणी भाजपचे प्रदेश कोषाध्यक्ष आमदार मिहीर कोटेचा यांनी केली. ही मागणी मान्य न झाल्यास न्यायालयात जाण्याचा इशारा त्यांनी दिला. या निविदा प्रक्रियेत काही मंत्री व त्यांच्या निकटवर्तीयांना किमान १६० कोटी रुपयांचा मलिदा मिळणार असल्याचा आरोपही आमदार कोटेचा यांनी केला. देवनार कत्तलखान्याच्या नूतनीकरणासाठी ४०० कोटी रुपयांची निविदा अलीकडेच प्रसिद्ध करण्यात आली आहे. या कत्तलखान्यात दररोज ५०० ते ६०० जनावरांची कत्तल केली जाते. नूतनीकरण निविदा भरण्यासाठी दररोज सुमारे २५ हजार जनावरांची कत्तल करण्याचा अनुभव हवा, अशी अट घालण्यात आली आहे. संपूर्ण देशात या अटीत बसू शकणारी एकही कंपनी नाही. ही निविदा प्रसिद्ध होण्याच्या आधीच अहमदनगर येथील एका कंपनीने १०० कोटी रुपयांची यंत्रसामग्री कोरियामधून आणण्यासाठी मागणी नोंदविली आहे असे त्यांनी सांगितले.
