मुंबई : मुंबई महापालिकेने वाहनचालक पदाच्या ५६ जागा भरण्याचे ठरवले आहे. मात्र या जागा अंतर्गत पद्धतीनेच भरण्यात येणार आहेत. पालिकेच्या कर्मचाऱ्यांकडून या जागा भरण्यासाठी अर्ज मागवण्यात आले आहेत. समान वेतन श्रेणीच्या, मराठी लिहिता – वाचता येणाऱ्या कामगारांना याकरीता अर्ज करता येणार आहेत.
कार्यकारी अभियंता (परिवहन) पाणीपुरवठा मलनिस्सारण या कार्यालयाच्या आस्थापनेवरील वाहनचालक या संवर्गातील ५६ रिक्त पदे लवकरच भरण्यात येणार आहेत. त्याकरीता संबंधित विभागाने पालिकेच्या सर्व खाते व विभागातील कामगार व तत्सम वेतनश्रेणीतील पात्र व इच्छुक कर्मचाऱ्यांकडून अर्ज मागवण्यात आले आहेत. इच्छुक कामगारांना १६ डिसेंबरपर्यंत अर्ज करता येणार आहेत. समान वेतनश्रेणी असलेल्या कामगारांकडून हे अर्ज मागवण्यात आले असून त्याबाबतचे परिपत्रक काढण्यात आले आहे. ५६ जागांपैकी १६ जागा महिलांसाठी आरक्षित आहेत.
हेही वाचा – bhandup school girls molested : भांडुपमधील खासगी शाळेत तीन विद्यार्थिनींचा विनयभंग
मुंबई महानगरपालिकेत तीन वर्षे सेवा झालेल्या कर्मचाऱ्यांना याकरीता अर्ज करता येणार आहे. तसेच उमेदवाराजवळ प्रादेशिक परिवहन कार्यालयाचा (आरटीओ) जडवाहन चालवण्याचा किमान एक वर्षापूर्वीचा वैध परवाना असावा, उमेदवाराला मराठी लिहिता-वाचता यावे, उमेदवाराला वैद्यकीय तपासणीत पात्र ठरणे आवश्यक आहे, अशा अटी या पदभरतीकरीता घालण्यात आल्या आहेत.
