मुंबई: फलटण येथील महिला डॉक्टर आत्महत्या प्रकरणाचा तपास विशेष तपास पथकामार्फत सुरू आहे. या तपासावर देखरेख करण्यासाठी पुणे येथील राज्य राखीव पोलिस बल क्रमांक १ च्या समादेशक तेजस्वी सातपुते यांची नियुक्ती करण्यात आली आहे. तपास योग्य दिशेने करून निश्चित कालमर्यादेत तपास पूर्ण करून घेण्याची जबाबदारी सातपुते यांच्या असणार आहे.
कायदा व सुव्यवस्था विभागाचे विशेष पोलिस महानिरीक्षक डॉ. मनोज कुमार शर्मा यांनी या बाबतचे आदेश दिले आहेत. आदेशात म्हटले आहे, सातारा जिल्ह्यात डॉ. संपदा मुंडे यांनी आत्महत्या केल्या प्रकरणी फलटण शहर पोलिस ठाण्यात गुन्हा दाखल करण्यात आला आहे. या गुन्ह्यात पोलिस खात्यातील एक पोलिस उपनिरीक्षक आरोपी असून, सदर प्रकरण अतिशय संवेदनशील बनले आहे. त्यामुळे या प्रकरणाच्या तपासावर योग्य पद्धतीने देखरेख होण्याची गरज असल्यामुळे तेजस्वी सातपुते यांची तपासावर देखरेख करण्यासाठी नियुक्ती करण्यात आली आहे. सातपुते यांनी तत्काळ सातारा येथे जावून सातारा पोलिस अधिकारी आणि तपास अधिकाऱ्यांकडून सविस्तर माहिती घ्यावी. गुन्ह्याचा तपास योग्य पद्धतीने व कालमर्यादेत होईल हे पहावे. तसेच तपासाचा प्रगती अहवाल वेळोवेळी कार्यालयास सादर करावा.
दरम्यान, या प्रकरणाचे गांभीर्य आणि संवेदनशीलता लक्षात घेऊन राज्याचे पोलिस महासंचालक यांना मुख्यमंत्री देवेंद्र फडणवीस यांनी तातडीने एसआयटी स्थापन करण्याचे निर्देश दिले होते. तसेच हा संपूर्ण तपास महिला आयपीएस अधिकाऱ्याच्या नेतृत्वाखालील विशेष तपास पथकाकडून करण्याचे निर्देश दिले होते.
डॉ. संपदा मुंडे आत्महत्या प्रकरण
फलटण येथील उपजिल्हा रुग्णालयातील महिला डॉ. संपदा मुंडे यांच्या आत्महत्येनंतर खळबळ उडाली आहे. आत्महत्येपूर्वी त्यांनी हातावर एक संदेश लिहून आपल्यावर वरिष्ठांचा आणि पोलिसांचा दबाव असल्याचे नमूद केले होते. त्यावरून विरोधकांकडून भाजपचे माजी खासदार रणजितसिंह नाईक निंबाळकर यांच्या स्वीय सहायकांसह पोलिस उपनिरीक्षक गोपाळ बदने यांच्यावर गंभीर आरोप करण्यात आले आहेत. पोलिस उपनिरीक्षक गोपाळ बदने याने चार वेळा बलात्कार केल्याचा गंभीर आरोपही केला आहे. या व्यतिरिक्त, मृतदेहाचा शवविच्छेदन अहवाल बदलण्यासाठी आपल्यावर रुग्णालयातील वरिष्ठांकडून तसेच पोलिसांकडून दबाव आणला जात असल्याची तक्रारही नोंदवली होती.
