बेस्टच्या दक्षता पथकाची आजवरची सर्वात मोठी कारवाई बेस्ट विद्युत विभागाच्या दक्षता पथकाने नुकतीच कारवाई करत माझगाव येथील एका कंपनीकडून होत असलेली वीजचोरी उघडकीस आणली. गेल्या साडेपाच वर्षांत या कंपनीकडून तब्बल ९ कोटी रुपयांची वीजचोरी झाल्याचा गुन्हा पोलिसांकडे नोंदवण्यात आला आहे. वीजचोरी प्रकरणांमधील ही आतापर्यंतची मोठी कारवाई आहे. माझगाव येथील सीताफळवाडीत बॉम्बे टी स्टेनिंग या कंपनीतील विद्युत मीटरमध्ये रात्री कोणतीही वाढ होत नसल्याचे दक्षता पथकाच्या लक्षात आले होते. २४ तास सुरू असणाऱ्या या कंपनीत रात्री युनिटमध्ये फरक न पडणे ही बाब संशयास्पद वाटल्याने गेले काही महिने या मीटर रीडिंगवर लक्ष ठेवण्यात आले. दिवसभर सुरू असलेला मीटर केवळ रात्रीच बंद पडत असल्याने दक्षता पथकाने शुक्रवारी मध्यरात्री या ठिकाणी छापा टाकला. मीटर केबीन कडेकोट बंदोबस्तात ठेवण्यात आल्याने मीटर तपासणीसाठी कर्मचाऱ्यांना पटकन जाता येत नव्हते; मात्र शुक्रवारी पूर्ण तयारीनिशी गेलेल्या पथकाने मीटरची तपासणी केली असता थेट विद्युतवाहिनीतून पुरवठा करण्यासाठी केबिनमध्ये व्यवस्था केल्याचे आढळले. रात्रीच्या बारा ते चौदा तासात थेट वीज वापरली जात होती व सकाळी पुन्हा मीटरमध्ये वाहिनी जोडली जात होती. या वाहिन्या बदलण्यासाठी वापरला जाणारा ग्लोव्हजही केबिनजवळ ठेवण्यात आला होता, अशी माहिती बेस्टचे दक्षता विभागाचे मुख्य अधिकारी आर. जे. सिंग यांनी दिली. या प्रकरणी दोन मीटरबाबत कारवाई केली असून तिसऱ्या मीटरची तपासणी सुरू आहे. स्टेटस बारचीही अडीच कोटींची वीजचोरी कंपनीला २०११ मध्येही मीटरमध्ये फेरफार केल्याबाबत पकडण्यात आले होते. तब्बल १७६ किलोव्ॉट क्षमतेच्या वाहिनीतून कंपनीकडून वापरली जाणारी वीज व कंपनीने आतापर्यंत भरलेले शुल्क यांचा विचार करता नोव्हेंबर २०११ पासून आतापर्यंत तब्बल ४२ लाख ८६ हजार युनिट्सची चोरी केली असून विद्युतशुल्कानुसार ९ कोटी रुपयांची वीजचोरी केली आहे. याबाबत माझगाव पोलिसांकडे मिकादर रतलामवाला यांच्याविरोधात तक्रार दाखल करण्यात आली. दोन महिन्यांपूर्वी माहीम येथील स्टेटस बारलाही वीजचोरी करताना पकडण्यात आले होते. त्यांनी अडीच कोटी रुपयांची वीजचोरी केली होती. मात्र शुक्रवारी रात्री पकडण्यात आलेली वीजचोरी ही आतापर्यंतची सर्वात मोठी घटना असल्याचे सिंग यांनी सांगितले.
