मुंबई विमानतळावर पावणेसात कोटींच्या कोकेनसह परदेशी नागरिकाला अटकेत

संशयीत प्रवाशाला पकडले

लिबेरिया येथून आलेल्या विमानातील एका प्रवाशावर डीआरआयच्या अधिकाऱ्यांना संशय आला. त्यामुळे डीआरआयच्या अधिकाऱ्यांनी त्याला थांबवले. चौकशीदरम्यान संबंधित प्रवासी घाबरलेला व अस्वस्थ असल्याचे निदर्शनास आले. नंतर त्याची वैद्यकीय तपासणी करण्यात आली. यामध्ये त्याच्या पोटात पिवळ्या रंगाच्या अनेक कॅप्सूल असल्याचे निदर्शनास आले. वैद्यकीय देखरेखीखाली त्याच्या पोटातील ५० गोळ्या बाहेर काढण्यात आल्या. त्या गोळ्यांमध्ये पांढऱ्या रंगाचा पदार्थ सापडला. तपासणीत ते कोकेन असल्याचे निष्पन्न झाले. त्यानंतर पंचनामा करून कोकेन जप्त करण्यात आले. आरोपीकडून एकूण ६७४ ग्रॅम कोकेन जप्त करण्यात आले. या अमली पदार्थाची अंदाजित किंमत सहा कोटी ७४ लाख रुपये असल्याची माहिती अधिकाऱ्याने दिली. याप्रकरणी अमलीपदार्थ प्रतिबंधक कायद्याअंतर्गत गुन्हा दाखल करण्यात आला असून आरोपी प्रवाशाला याप्रकरणी अटक करण्यात आल्याचे अधिकाऱ्याने सांगितले. या प्रकरणाचा सखोल तपास सुरू आहे.

आंतरराष्ट्रीय टोळीचा सहभाग

याप्रकरणात आंतरराष्ट्रीय टोळीचा सहभाग असल्याचा संशय डीआरआयच्या अधिकाऱ्यांना आहे. आरोपी प्रवाशाला कोकेन तस्करीसाठी रक्कम मिळणार होती. त्यापूर्वीच त्याला अटक झाली. आरोपीच्या साथीदारांचा शोध सुरू असल्याचे अधिकाऱ्याने सांगितले.

मुंबई कोकेनचे वितरण केंद्र

मुंबई व दिल्लीतील येणारा कोकेनचा साठा तुलनेने सर्वाधिक आहे. उच्चभ्रू तरूणांमध्ये कोकेनला जास्त मागणी आहे. दक्षिण अमेरिका व आफ्रीकेतून कोकेनची सर्वाधीक तस्करी होते. कोकेनच्या वितरणाचे मुंबई प्रमुख केंद्र आहे. कोकेनच्या तस्करीसाठी पूर्वी आफ्रिका खंडातील गरीब देशांमधील नागरिकांचा वापर करण्यात येत. पण सध्या दक्षिण अमेरिकेतील बोलिव्हिया, व्हेनेझुएला, गयाना, ब्राझील, कोलंबिया आणि सुरिनाम या देशांतील गरीब नागरिकांचाही कोकेनच्या तस्करीसाठी वापर करण्यात येत आहे. कोकेनच्या तस्करीसाठी अदीस अबाबा ते दुबई व मग दुबई ते मुंबई हा हवाई मार्ग कुख्यात आहे. याच मार्गाचा वापर करून भारतात कोकेन येते. भारतात राहून बेकायदेशीर कामे करण्यासाठी तस्कर नवनवीन कार्यपद्धतीचा अवलंब करीत आहेत.