घाटकोपरवासियांनी १० दिवस पाणी उकळून, गाळून प्यावे

मुंबई : घाटकोपरवासियांना पुढील दहा दिवस पाणी उकळून व गाळून प्यावे लागणार आहे. घाटकोपर (पश्चिम) येथील भटवाडी परिसरातील जलाशयाची दुरुस्ती पूर्ण झाली असून पाणीपुरवठा सुरळीत झाला आहे. मात्र खबरदारीचा उपाय म्हणून नागरिकांनी पाणी उकळून व गाळून प्यावे, अशी सूचना मुंबई महापालिकेने केली आहे.

घाटकोपर (पश्चिम) येथील भटवाडी परिसरातील आर. बी. कदम मार्ग नजिकच्या घाटकोपर निम्नस्तरीय जलाशयाच्या कप्पा क्रमांक २ ची संरचनात्मक दुरुस्ती पूर्ण झाली असून सोमवार, १७ मार्चपासून संरचनात्मक दुरुस्ती केलेल्या कप्पा क्रमांक २ मधून पाणीपुरवठा सुरू करण्यात येणार आहे. मात्र खबरदारीचा उपाय म्हणून संबंधित परिसरातील नागरिकांनी सोमवार, १७ मार्चपासून पुढील १० दिवस म्हणजे गुरुवार, २७ मार्चपर्यंत पाणी उकळून व गाळून प्यावे, अशी सूचना मुंबई महानगरपालिका प्रशासनाने केली आहे.

घाटकोपर निम्नस्तरीय जलाशयाच्या कप्पा क्रमांक २ ची दुरुस्ती पूर्ण झाल्यानंतर आता कप्पा क्रमांक १ च्या दुरुस्तीचे काम हाती घेण्यात येणार आहे.

या विभागातील राहिवाशांना सूचना

• नारायणनगर- चिराग नगर, आझाद नगर, गणेश मैदान, पारशीवाडी, नवीन माणिकलाल वसाहत, एन. एस. एस. मार्ग, महिंद्रा उद्यान (पार्क), डी. एस. मार्ग, खलई गाव, किरोल गाव, विद्याविहार (पश्चिम), हंसोटी गल्ली, खोत गल्ली, महात्मा गांधी मार्ग, नौरोजी गल्ली, एच. आर. देसाई मार्ग, कामा गल्ली, श्रद्धानंद मार्ग, जे. व्ही. मार्ग, गोपाळ गल्ली, जीवदया गल्ली, गीगावाडी.
• पंतनगर आउटलेट- भीम नगर, पवार चाळ, लोअर भीमनगर, क्राईम ब्रांच परिसर, वैतागवाडी, नित्यानंद नगर, धृवराजसिंग गल्ली मार्ग, सी. जी. एस. वसाहत, गंगावाडी, एम. टी. एन. एल. गल्ली, अंधेरी-घाटकोपर जोडमार्ग, लाल बहादूर शास्त्री मार्ग, घाटकोपर (पश्चिम) लगतचा परिसर, श्रेयस सिग्नल इत्यादी.
• सर्वोदय बुस्टींग- सेनिटोरीयम गल्ली, एच. आर. देसाई मार्ग, कामा गल्ली, श्रद्धानंद मार्ग, जे. व्ही. मार्ग, गोपाळ गल्ली, लाल बहादूर शास्त्री मार्गालगतचा परिसर, घाटकोपर (पश्चिम), गांधी नगर.

घाटकोपर जलाशयाविषयी….

घाटकोपर परिसराला पाणीपुरवठा करणाऱ्या जलाशयाची संरचनात्मक दुरुस्ती करण्याचे काम पालिकेने हाती घेतले होते. घाटकोपर येथील जलाशय ४९ वर्षे जुने आहे. हे काम करण्यासाठी तब्बल दीड वर्षाचा कालावधी लागला. हा जलाशय १९७३ मध्ये बांधण्यात आला असून तो दोन कक्षात विभागला आहे. त्याची एकूण पाणी साठवण क्षमता ११.३५ दशलक्ष लिटर इतकी आहे. या जलाशयाची संरचनात्मक तपासणी पालिकेने करून घेतली होती. जलाशयाला व्यापक संरचनात्मक दुरुस्तीची गरज असल्याचे अहवालात म्हटले होते. त्यामुळे पाणीपुरवठा विभागाने ही कामे हाती घेतली होती. आता त्यापैकी एका कप्प्याचे काम पूर्ण झाले आहे. जलाशयाला असलेले जलभेदीकरण (लिकेज), जलाशयाच्या भिंतीचे सिमेंट काँक्रीटीकरण, जलाशयाच्या आतील स्तंभ व पायऱ्यांच्या दुरुस्तीची कामे केली जात आहेत. या कामासाठी पालिकेने ९ कोटी ५३ लाख रुपये खर्च केले आहेत.