वांगणी – शेलू नको, मुंबईतच घरे हवी, गिरणी कामगारांचा निर्धार

मंगळवारी १६ संघटनांनी एकत्र येऊन आझाद मैदानावर धडक दिली. जोपर्यंत मुंबईत घरे देण्याची मागणी मान्य होत नाही तोपर्यंत आंदोलन सुरूच राहील, असा निर्धार यावेळी कामगारांनी व्यक्त केला. राज्य सरकार आतापर्यंत अंदाजे १६ हजार गिरणी कामगार आणि त्यांच्या वारसांना घरे देऊ शकले आहे. तर आजघडीला एक लाख ९ हजार गिरणी कामगारांच्या घरांचा प्रश्न गंभीर आहे.

मुंबईत गिरणी कामगारांच्या घरांसाठी जागाच नसल्याने आता मुंबई महानगर प्रदेशात घरांसाठी जागेचा शोध घेतला जात आहे. त्यानुसार वांगणी – शेलू येथे गिरणी कामगारांसाठी ८१ हजार घरे बांधण्याचा निर्णय घेण्यात आला असून त्यांची कार्यवाही सुरू आहे. तर आता कल्याणमध्ये आणखी ११ हेक्टर जागा शोधण्यात आली आहे. ही जागा लवकरच म्हाडाच्या मुंबई मंडळाला घरासाठी उपलब्ध होण्याची शक्यता आहे.

या जागेवर १० हजार घरे बांधली जाण्याची शक्यता आहे. मात्र गिरणी कामगार, वारस आणि मोठ्या संख्येने गिरणी कामगार संघटनांचा वांगणी-शेलूतील घरांना विरोध आहे. हा प्रकल्प रद्द करून मुंबईतच घरे देण्याची मागणी होत आहे. मात्र ही मागणी डावलून कामगारांना मुंबईबाहेरच फेकण्याचा सरकारचा डाव असल्याचा आरोप करीत १६ गिरणी कामगार संघटना आता आक्रमक झाल्या आहेत.

१६ संघटनांनी एकत्र येऊन गिरणी कामगार संयुक्त लढा समितीच्या माध्यमातून मंगळवारी आझाद मैदानावर धडक दिली. आझाद मैदानावरील आंदोलनास राज्यभरातील कामगारांनी मोठ्या संख्येने उपस्थिती लावली. या आंदोलनाचे नेतृत्व आमदार सचिन अहिर यांनी केले.गिरणी कामगारांच्या घरांचा प्रश्न पूर्णपणे मार्गी लागत नाही, तोपर्यंत आम्ही स्वस्थ बसणार नाही.

मुंबईत सर्व गिरणी कामगारांना, त्यांच्या वारसांना सामावून घ्यावे यासाठी रस्त्यावर आणि विधानसभेतही आवाज उठवू.कामगारांना मुंबईत घरे देण्याचा निर्णय जोवर होत नाही तोवर आमचे आंदोलन सुरूच राहील, असा निर्धार यावेळी सचिन अहिर यांनी व्यक्त केला.