सरकार वाचविण्यासाठी हालचाली सुरू; शरद पवार- उद्धव ठाकरे यांच्यात सविस्तर चर्चा

मुंबई : शिवसेनेतील बंडामुळे अडचणीत आलेले सरकार वाचविण्यासाठी काँग्रेस व राष्ट्रवादी काँग्रेसने मुख्यमंत्री उद्धव ठाकरे यांना भक्कम साथ दिली आहे. मुख्यमंत्र्यांच्या पाठीशी रहायचे आणि सरकार टिकवायचे ही पक्षाची भूमिका कायम राहणार असल्याचे उपमुख्यमंत्री अजित पवार यांनी शुक्रवारी सांगितले.

जे आमदार गुवाहटीला गेले आहेत ते आम्ही शिवसेनेचे आहोत असे सांगत आहेत, त्यामुळे महाविकास आघाडीतील तिन्ही पक्ष मिळून बहुमत आहेच, असा दावा पवार यांनी केला. अजून तरी अधिकृतपणे कुणी सरकारचा पाठिंबा काढून घेतलेला नाही, त्यामुळे सरकार अस्तित्वात आहे, सरकारचे कामकाज सुरू आहे, असे राष्ट्रवादी काँग्रेसचे प्रदेशाध्यक्ष तथा जलसंपदा मंत्री जयंत पाटील यांनी सांगितले. एकनाथ शिंदे सरकारमध्ये मंत्री आहेत. त्यांनी अजून राजीनामा दिलेला नाही, असे ते म्हणाल़े

‘संकटकाळात राणेंना पवारांचीच मदत’

विधानसभेत बहुमत सिद्ध करण्याबाबतची राष्ट्रवादी काँग्रेसचे अध्यक्ष शरद पवार यांनी भूमिका मांडल्यानंतर, त्यावर धमकीवजा टीका करणाऱ्या केंद्रीय मंत्री नारायण राणे यांचा जयंत पाटील यांनी समाचार घेतला.  नारायण राणे यांना त्यांच्या संकटकाळात कितीतरी वेळा पवारसाहेबांनी मदत केली आहे. पाठिंबा व आधार दिला आहे. त्याचे स्मरण जरी त्यांनी केले तरी त्यांना वाटेल आपण केलेले विधान मागे घ्यावे, असा टोलाही पाटील यांनी लगावला.