राज्यातील शाळांना सुटी, तर मुंबई विद्यापीठाने परीक्षा पुढे ढकलल्या

मुंबई विद्यापीठाच्या सध्या हिवाळी सत्राच्या परीक्षा सुरू आहेत. त्यानुसार सर्व महाविद्यालये व परीक्षा केंद्रांवर परीक्षा घेण्यात येत आहेत. मात्र उपमुख्यमंत्री अजित पवार यांचे बुधवारी सकाळी विमान अपघातात निधन झाले. त्यामुळे राज्य सरकारने तीन दिवसांचा दुखवटा जाहीर करत २८ जानेवारी रोजी शासकीय कार्यालयांना सुटी जाहीर केली. त्याअनुषंगाने मुंबई विद्यापीठाच्या सुरू असलेल्या दुपारच्या सत्रातील परीक्षा पुढे ढकलण्याचा निर्णय जाहीर केला. संबंधित विद्यार्थ्यांना याबाबत तात्काळ कळविण्याच्या सूचना विद्यापीठाने महाविद्यालयांना दिल्या

वाणिज्य व व्यवस्थापन, कला व शिक्षण शाखांशी संलग्न महाविद्यालयांचे प्राचार्य, तसेच सेंटर फॉर डिस्टन्स अँड ऑनलाइन एज्युकेशनचे (सीडीओई) संचालक यांना यासंदर्भात पत्राद्वारे कळवण्यात आले आहे. २८ जानेवारी रोजी दुपारी होणाऱ्या परीक्षा पुढील तारखेला घेण्याचा निर्णय विद्यापीठाने घेतला. या परीक्षेसंदर्भातील नव्या तारखा लवकरच जाहीर केल्या जातील, असेही विद्यापीठाकडून जाहीर करण्यात आले.

शाळांनाही सुटी जाहीर

उपमुख्यमंत्री अजित पवार यांच्या निधनाच्या पार्श्वभूमीवर राज्यातील सर्व शाळांना दुपारच्या सत्रामध्ये सुटी जाहीर करण्याचा निर्णय शालेय शिक्षण विभागाने घेतला. त्यानुसार शिक्षण संचालक डॉ. महेश पालकर यांनी विभागीय शिक्षण उपसंचालक, शिक्षणाधिकारी, शिक्षण निरीक्षक यांना पत्राद्वारे कळवले.