मुंबई : मुंबई, ठाणे, भिवंडी, पिंपरी-चिंचवड, मालेगावसह राज्यातील २६ ठिकाणी गोवरचा संसर्ग झाला असून, आतापर्यंत ७२४ बाधित आढळले आहेत. राज्यभरात सुमारे १२ हजार गोवर संशयित आढळून आले आहेत. गोवरबाधितांचे सात दिवस विलगीकरण करून त्यांच्यावर तिथेच उपचार करून नंतर स्थलांतरित करण्याच्या सूचना आरोग्य यंत्रणेला दिल्याची माहिती आरोग्यमंत्री तानाजी सावंत यांनी बुधवारी दिली. राज्यात आतापर्यंत गोवरमुळे १५ बालकांचा मृ्त्यू झाला आहे. मुंबई, ठाणे, भिवंडी, नवी मुंबई, वसई-विरार, पनवेल, पिंपरी-चिंचवड मालेगाव, औरंगाबाद, बुलढाणामध्ये गोवरची साथ पसरली आहे. या सर्व ठिकाणी सार्वजनिक आरोग्य विभागाच्या आणि महानगरपालिकेच्या ८७७ पथकांच्या माध्यमातून सर्वेक्षण आणि तपासणी करण्यात येत आहे. गोवरची लक्षणे असल्यास संबंधित बालकांची माहिती तात्काळ आरोग्य विभागास द्यावी, अशा सूचना शाळा व्यवस्थापनाला देण्यात आल्या आहेत. गोवर प्रतिबंधात्मक औषधे, ‘अ’ जीवनसत्वाची मात्रा भरपूर प्रमाणात उपलब्ध आहेत, असे सावंत यांनी सांगितले.
