बारावीचा निकाल जाहीर होऊन महिना झाला तरी शिक्षक मानधनापासून वंचित

राज्य शिक्षण मंडळाच्या वतीने दरवर्षी बारावीच्या निकालानंतर काही दिवसांतच उत्तरपत्रिका तपासणीचे मानधन शिक्षकांच्या खात्यावर जमा केले जाते. यंदा २ मे रोजी बारावीचा निकाल जाहीर झाला. मात्र २ जूनपर्यंतही बहुतांश शिक्षकांना मानधन मिळाले नाही. मुंबई विभागीय कनिष्ठ महाविद्यालयीन शिक्षक संघटनेचे सरचिटणीस प्रा. मुकुंद आंधळकर यांनी दिलेल्या माहितीनुसार, मुंबई विभागीय शिक्षण मंडळाने सुमारे ९ हजार ८०० शिक्षकांच्या मानधनासाठी जवळपास २ कोटी रुपये निधी वाशी येथील एका बँकेच्या शाखेत जमा केला होता. २५ एप्रिल, ७ मे आणि ११ मे रोजी तीन टप्प्यांत ही रक्कम बँकेकडे वर्ग करण्यात आली. मात्र त्यापैकी केवळ सुमारे २ हजार शिक्षकांनाच मानधन मिळाले असून उर्वरित ७ हजार ५०० शिक्षकांना अद्याप मानधनाची रक्कम मिळालेली नाही.

शिक्षण मंडळाने निधी उपलब्ध करून दिल्यानंतरही तो वेळेत शिक्षकांच्या खात्यावर जमा करण्यात बँकेला अपयश आले आहे. त्यामुळे हजारो शिक्षकांना आर्थिक अडचणींचा सामना करावा लागत आहे. विद्यार्थ्यांकडून परीक्षा शुल्क उशिरा भरल्यास दंड आकारला जातो, मात्र शिक्षकांचे मानधन रखडल्यास त्यांना कोणतीही भरपाई मिळत नाही, अशी नाराजी शिक्षकांकडून व्यक्त केली जात आहे.

“पेपरतपासणीचे काम शिक्षकांनी नियोजित वेळेत पूर्ण केले. शिक्षण मंडळानेही बँकेकडे निधी वर्ग केला. तरीही हजारो शिक्षकांना महिनाभर मानधनापासून वंचित राहावे लागत आहे. त्यामुळे या प्रकरणाची चौकशी करून संबंधित बँकेवर आर्थिक दंड आकारावा, शिक्षकांना व्याजासह मानधन अदा करावे, तसेच भविष्यात अशा प्रकारची पुनरावृत्ती टाळण्यासाठी बँक बदलण्याचा विचार करावा, अशी मागणी प्रा. मुकुंद आंधळकर यांनी केली आहे.