साहिलला न्याय मिळेपर्यंत लढा सुरूच ठेवणार; वडील रविंद्र वाकोडे यांचा सोमवारपासून आझाद मैदानात ठिय्या

सांगितले. साहिल वाकोडे हा २२ वर्षीय विद्यार्थी आयआयटी मुंबईमध्ये ऊर्जा विज्ञान आणि अभियांत्रिकीच्या द्वितीय वर्षात शिकत होता. १८ सप्टेंबरच्या सायंकाळी वसतिगृहातील खोलीत तो मृतावस्थेत आढळून आला. मध्यसत्र परीक्षेदरम्यान मोबाइलचा वापर करून चॅटजीपीटीच्या माध्यमातून प्रश्नपत्रिकेतील प्रश्नांची उत्तरे मिळवण्याचा प्रयत्न केल्याचा आरोप त्याच्यावर करण्यात आला होता. साहिलच्या पालकांनी त्याच्याशी जातीय भेदभाव झाल्याचा आरोप केला आहे. या प्रकरणाच्या निषेधार्थ त्यांनी गुरुवारी आझाद मैदानात उपोषणही केले होते.

प्रा. सूर्यनारायण दुल्ला रजेवर साहिलला प्रवृत्त केल्याच्या आरोपासह जातीय भेदभावाच्या तक्रारीची मुंबई पोलिसांच्या गुन्हे शाखेकडून चौकशी सुरू आहे. साहिलच्या मृत्यूबाबत परिस्थितीची चौकशी करण्यासाठी आयआयटी मुंबईच्या मंडळाने यापूर्वी दहा सदस्यांची समिती स्थापन केली आहे. पोलिसांच्या एफआयआरमध्ये जातीय भेदभाव आणि आत्महत्येस प्रवृत्त केल्याच्या आरोपांखाली नाव असलेले प्रा. सूर्यनारायण दुल्ला यांना निष्पक्ष चौकशीसाठी आधीच रजेवर पाठवण्यात आले आहे.

चाैकशी समितीतील सदस्यांवर समर्थनाचा आरोप

शुक्रवारी रात्री आयआयटी मुंबईतील विद्यार्थ्यांनी साहिलच्या मृत्यूच्या चौकशी समितीची पुनर्रचना करण्याच्या मागणीसाठी कॅन्डल मार्च काढला. विद्यमान चौकशी समितीतील काही सदस्यांनी प्रा. दुल्ला यांच्या समर्थनार्थ भूमिका घेतल्याचा आरोप विद्यार्थ्यांनी केला आहे. देशातील अन्य नामांकित संस्थांमधील विद्यार्थी संघटनांनीही वाकोडे कुटुंबाला पाठिंबा देत प्रकरणाची पारदर्शक चौकशी करून दोषींवर कारवाई करण्याची मागणी केली आहे. रविवारीही मुंबईतील विद्यार्थी संघटना आयआयटीच्या मुख्य प्रवेशद्वारावर आंदोलन करण्यासाठी आले होते. मात्र पोलिसांनी आंदोलन करण्यास मनाई केल्याचे समजते.