ईडीचे कोल्हापूर, सूरत, नगर आणि पुणे येथे छापे; बेकायदा फॉरेक्स गुंतवणूक प्रकरण

सामान्य नागरिकांची गुंतवणुकीच्या नावाखाली फसवणूक केल्याप्रकरणी विनोद तुकाराम खुटे, संतोष खुटे, मंगेश खुटे, किरण पितांबर अनारसे, अजिंक्य बडाधे आणि इतर अज्ञात व्यक्तींविरुद्ध पुण्यातील भारती विद्यापीठ पोलीस ठाण्यात गुन्हा दाखल करण्यात आला होता. त्याच गुन्ह्यांच्या आधारे ईडी याप्रकरणी तपास करीत आहे. चांगला परतावा देण्याच्या नावाखाली गुंतवणूक योजना व ट्रेडिंगमध्ये आमिष दाखवून आरोपींनी बनावट कंपन्यांच्या माध्यमांतून विविध बँक खात्यात गुंतवणूकदारांची १०० कोटी रुपयांहून अधिक जमा केली. याप्रकरणी ईडीने दिलेल्या माहितीनुसार दुबईत वास्तव्याला असलेला विनोद खुटे हा याप्रकरणातील मुख्य आरोपी असून त्याने दुबईस्थित कंपनी मेसर्स काना कॅपिटल लिमिटेडच्या माध्यमातून विविध बेकायदेशीर व्यापार, क्रिप्टो एक्सचेंज, वॉलेट सेवा, फॉरेक्स ट्रेडिंच्या नावाखाली फसवणूक केल्याचा आरोप आहे.

ईडीने दिलेल्या माहितीनुसार विनोद खुटेने मेसर्स व्हीआयपीस् ग्रुप अंतरग्त अनेक कंपन्या स्थापन केल्या. त्यामार्फत गुंतवणुकदारांकडून रक्कम गोळा केली. ती रक्कम बनावट कंपनी व खात्यांच्या माध्यमतून व्यवहारात आणण्यात आली. त्यानंतर हवाला ऑपरेटर्सच्या माध्यमातून पैसे भारतातून दुबईत पाठवण्यात आले. हे व्यवहार तपास यंत्रणाच्या नजरेत येऊ नये यासाठी यूएसडीटी सारख्या कूट चलनाचा वापर करण्यात आला. आतापर्यंत विनोद खुटेने केलेल्या खर्चाचा तपशील ईडीने तपासला असता गुन्ह्यातील रक्कम १०० कोटी रुपयांपेक्षा अधिक आहे. या रकमेतून दुबई व भारतात मालमत्ता खरेदी करण्यात आल्या आहेत. यापूर्वी ईडीने विनोद खुटे यांच्याशी संबंधित पुणे, अहमदाबाद, मुंबई येथील विविध ठिकाणी छापे टाकले होते. तसेच मार्च महिन्यात दुबईतील ३७ कोटी रुपयांची मालमत्तेवर टाच आणली होती. याप्रकरणी आतापर्यंत एकूण ७५ कोटी ४२ लाख रुपयांच्या मालममत्तेवर ईडीने टाच आणली आहे. त्याबाबत तपास सुरू आहे.