राष्ट्रवादी काँग्रेसचे प्रदेशाध्यक्ष आणि जलसंपदामंत्री जयंत पाटील यांनी आज (शनिवार) सायंकाळी पक्षाच्या कामासाठी सीएसएमटी ते उल्हासनगर असा लोकलने प्रवास केला. खुद्द मंत्रीमोहदय लोकल प्रवास करताना पाहून अनेकांना आश्चर्य देखील वाटले. मुंबईमध्ये कमी वेळेत लांबचे अंतर कापायचे असेल किंवा वेळेत कुठे पोहोचायचे असेल तर मुंबई लोकल हा सर्वात उत्तम पर्याय ! हाच पर्याय जलसंपदा मंत्री जयंत पाटील यांनी निवडला. विशेष म्हणजे लोकलमध्येही जयंत पाटील शासकीय कामाचा निपटारा करताना दिसले. आज पक्षाच्या कामकाजाकरीता उल्हासनगरला जात असताना जयंत पाटील यांनी बर्‍याच दिवसांनी आपल्या सहकाऱ्यांसह लोकलने प्रवास केला. विद्यार्थी दशेत असताना जयंत पाटील यांनी लोकलने प्रवास केलेला आहे. तसेच मधल्याकाळातही अनेकवेळा त्यांनी लोकलने प्रवास केला होता. आजच्या प्रवासातील सहकाऱ्यांसोबत चर्चेदरम्यान सर्व जुन्या आठवणींना जयंत पाटील यांनी यावेळी उजाळा दिल्याची माहिती समोर आली.
