जोगेश्वरीत सरकत्या जिन्यांचा स्कायवॉक

महानगरपालिका प्रशासनाने जोगेश्वरी पूर्व व पश्चिम भाग जोडण्यासाठी स्कायवॉक बांधण्याचे ठरवले आहे.

एमएमआरडीएने बांधलेल्या बहुतांश स्कायवॉक वापराविना जागा अडवून धरत असतानाच महानगरपालिकेने जोगेश्वरी येथे पूर्व-पश्चिम विभाग जोडणारा स्कायवॉक बांधण्याचे ठरविले आहे. दहा कोटी रुपयांचा खर्च अपेक्षित असलेल्या या स्कायवॉकसाठी सरकते जिने लावले जाणार असल्याने तो पादचाऱ्यांसाठी दिलासा ठरू शकेल.
वांद्रे येथील स्कायवॉकचा अपवाद वगळता शहरात इतरत्र बांधलेल्या स्कायवॉकना फारसा प्रतिसाद मिळाला नसल्याने एमएमआरडीएने नवीन स्कायवॉक बांधण्याचा प्रकल्प तीन वर्षांपूर्वी गुंडाळला. मात्र आता महानगरपालिका प्रशासनाने जोगेश्वरी पूर्व व पश्चिम भाग जोडण्यासाठी स्कायवॉक बांधण्याचे ठरवले आहे. यापूर्वी उंच स्कायवॉकवर चढण्यासाठी त्रास होत असल्याने बहुतांश पादचारी खालच्या, रहदारीच्या मार्गावरूनच चालणे पसंत करतात. ही स्थिती लक्षात घेऊन पालिकेने स्कायवॉकला सरकते जिने लावण्याचा निर्णय घेतला आहे.
जोगेश्वरी पश्चिम येथील एस. व्ही. रोडवरील माल्कम बागेपासून पूर्वेकडील इस्माइल युसुफ महाविद्यालयापर्यंत हा स्कायवॉक होणार असून त्याला सरकते जिने बसविले जातील. या स्कायवॉकच्या आरेखनासाठी मे. एस. एन. भोबे आणि असोसिएट्स यांची सल्लागारपदी नेमणूक केली होती. हा स्कायवॉक बांधण्यासाठी सर्वात कमी किंमतीची निविदा मे. एस. व्ही. इनोव्हाबिल्ड प्रा. लि. कडून आली आहे. काम दिल्यापासून अठरा महिन्यात स्कायवॉक बांधणे अपेक्षित आहे. स्थायी समितीच्या गुरुवारी होत असलेल्या सभेत मंजुरी मिळाल्यास दोन वर्षांत हा स्कायवॉक तयार होईल.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व मुंबई बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Jogeshwari skywalk has escalators

ताज्या बातम्या