माझ्याही व्यक्तिमत्त्व हक्कांचे संरक्षण करा; अभिनेता कार्तिक आर्यनचीही उच्च न्यायालयात धाव

कार्तिकच्या याचिकेनुसार, त्याचे नाव, प्रतिमा आणि चेहरा यांचा वापर विविध वस्तू, जाहिराती आणि इतर डिजिटल मजकुरावर परवानगीशिवाय केला जात आहे; त्यामुळे त्याच्या प्रसिद्धी आणि खासगी जीवन जगण्याच्या हक्कांचे उल्लंघन होत आहे, असा दावा कार्तिकने केला आहे. तसेच, प्रतिवादींना व्यावसायिक उद्देशांसाठी कृत्रिम बुद्धिमत्ता (एआय) आणि डीपफेकचा वापर करून आपली छायाचित्रे, चित्रफिती, आवाज किंवा इतर कोणत्याही वैयक्तिक वैशिष्ट्यांचा वापर करण्यापासून रोखण्यासाठी कायमस्वरूपी मनाई आदेश देण्याची मागणी केली आहे.

ऑनलाइन व्यासपीठे आणि संबंधित अधिकाऱ्यांना असा मजकूर काढून टाकण्याची, तसेच त्यामागे असलेल्या व्यक्तींची ओळख उघड करण्याची मागणीही कार्तिकने याचिकेद्वारे केली आहे.