scorecardresearch

Premium

Lata Mangeshkar Passes Away : केवळ स्वर नाही, तर भारतीय संगीताचा आत्मा हरपला – देवेंद्र फडणवीस

Lata Mangeshkar Death : “त्या स्वर्गातूनही सुरांची बरसात नक्कीच करतील”, असंही फडणवीस म्हणाले आहेत.

(फोटो सौजन्य - देवेंद्र फडणवीस ट्वीटर)
(फोटो सौजन्य – देवेंद्र फडणवीस ट्वीटर)

Lata Mangeshkar Passes Away : “लतादीदी मंगेशकर यांच्या निधनाने केवळ स्वर नाही, तर भारतीय संगीताचा आत्मा हरपला आहे. भारतीय संगीताचे हे दैवत आज आपल्यात नाही, ही कल्पनाच करवत नाही. ईश्वराने भारताला दिलेली अमूल्य देणगी हिरावून घेतली आहे. आपल्या आयुष्यातील अविभाज्य घटक हरपला आहे. ” अशा शब्दांमध्ये विरोधी पक्षनेते देवेंद्र फडणवीस यांनी श्रद्धाजंली अर्पण केली आहे.

भारताच्या गानकोकिळा म्हणून प्रसिद्ध असलेल्या लता मंगेशकर यांचे आज निधन झाले आहे. त्या ९२ वर्षांच्या होत्या. गेल्या काही दिवसांपासून प्रकृती ठीक नसल्यामुळे त्यांच्यावर मुंबईतील ब्रीच कँडी रुग्णालयात उपचार सुरु होते. मात्र आज सकाळी उपचार सुरु असताना त्यांची प्राणज्योत मालवली. लतादीदींच्या निधनामुळे सर्वत्र शोककळा पसरली आहे. राष्ट्रपती, पंतप्रधानांपासून सर्वच मान्यवरांकडून त्यांना भावपूर्ण श्रद्धांजली अर्पण केली जात आहे.

pankaj-tripathi
Video: पंकज त्रिपाठी यांचं खरं नाव माहितेय का? म्हणाले, “मी माझं आडनाव बदललं कारण…”
cm eknath shinde uddhav thackeray (1)
“एक फुल, एक हाफ” म्हणत एकनाथ शिंदेंचा उद्धव ठाकरेंना टोला; म्हणाले, “त्यांचा खरा चेहरा…!”
tanushree dutta on nana patekar
“ते आधीच रस्त्यावर आले आहेत”, तनुश्री दत्ता नाना पाटेकरांचा एकेरी उल्लेख करत म्हणाली, “त्यांची लायकी…”
Marathi actress Amruta Khanvilkar
“स्वामींची शक्ती विलक्षण आहे”; अभिनेत्री अमृता खानविलकरने सांगितला स्वामी समर्थांचा अनुभव, म्हणाली, “ज्यांना आयुष्यात…”

Lata Mangeshkar Passes Away Live : गानसम्राज्ञी लता मंगेशकर यांचं निधन

विरोधी पक्षनेते देवेंद्र फडणवीस यांनी देखील ट्वीटद्वारे श्रद्धांजली अर्पण केली आहे. “ ‘ऐ मेरे वतन के लोगो’तून प्रत्येकाच्या अश्रूंना वाट मोकळी करून देण्याचे सामर्थ्य जसे त्यांच्या सुरांमध्ये होते, तसेच अनेकांच्या आयुष्यातील स्वप्नांना आणखी उंच भरारी घेण्यासाठी बळ देण्याचे काम लतादीदींच्या सुरांनी केले. वृद्ध असो की तरुण लतादीदींच्या सुरात रममाण न होणारा विरळाच!” असंही देवेंद्र फडणवीस म्हणाले आहेत.

आयुष्याच्या अखेरपर्यंत स्वातंत्र्यवीर सावरकर यांची निस्सिम भक्ती –

तसेच, “स्वातंत्र्यवीर सावरकर यांची निस्सिम भक्ती आयुष्याच्या अखेरपर्यंत त्यांनी जपली. वीर सावरकरांच्या विचारांची तन-मन-धनाने सेवा करण्याचे काम लतादीदींनी केले. प्रखर राष्ट्रवाद जपणारे हे संपूर्ण मंगेशकर कुटुंब लतादीदींनी कुटुंबप्रमुखाच्या भूमिकेतून जपले. त्यांची विविध कार्यक्रमांमध्ये अनेकदा भेट व्हायची. प्रत्येकवेळी आपुलकीने विचारपूस असायची. भेट झाली नाही, तर फोन करून ‘कसा आहेस देवेंद्र’ हे शब्द मोठ्या बहिणीची उणीव भरून काढणारे असायचे. त्यांचे जाणे, ही माझी सुद्धा वैयक्तिक आणि मोठी हानी आहे.” अशा शब्दांमध्ये फडणवीसांनी लतादीदींच्या आठवणींना उजाळा दिला आहे.

त्या स्वर्गातूनही सुरांची बरसात नक्कीच करतील –

याचबरोबर, “लतादीदींचे स्वर हे कायम आपल्यासोबत राहणार आहेत, हेच सांगत स्वत:ची समजुत करून घ्यायची, एवढेच आता आपल्या हाती आहे. त्या स्वर्गातूनही सुरांची बरसात नक्कीच करतील. भारतरत्न लतादीदींना माझी भावपूर्ण श्रद्धांजली! मंगेशकर कुटुंबीय, संपूर्ण भारतवासियांच्या दु:खात मी सहभागी आहे. ॐ शांती.” असं म्हणत देवेंद्र फडणवीस यांनी ट्वीटद्वारे लतादीदींना भावपूर्ण श्रद्धांजली अर्पण केली आहे.

Latest Comment
View All Comments
Post Comment

Mumbai News (मुंबई न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.

Web Title: Lata mangeshkar passes away not just the voice but the soul of indian music is lost devendra fadnavis msr

First published on: 06-02-2022 at 11:10 IST

संबंधित बातम्या

मराठी कथा ×