मुंबई : मुंबईत कुष्ठरोग निर्मूलनासाठी ३० जानेवारी ते १४ फेब्रुवारी या पंधरवड्यात स्पर्श मोहीम राबविण्यात येणार आहे. या काळात पालिकेचे कर्मचारी घरोघरी भेट देऊन कुष्ठरोगाचे सर्वेक्षण आणि जनजागृती करणार आहेत. मुंबईत दरवर्षी राष्ट्रीय कुष्ठरोग निर्मूलन कार्यक्रम अंतर्गत स्पर्श कुष्ठरोग मोहीम राबविली जाते. याहीवर्षी मोहिमेचे आयोजन केले असून ह्यह्णकुष्ठरोगमुक्तीकडे वाटचालह्णह्ण हे घोषवाक्य आहे. पालिकेच्या क्षेत्रातील विविध परिसरांमध्ये घरोघरी भेट देऊन कुष्ठरोगाचे सर्वेक्षण केले जाणार आहे. तसेच पालिकेच्या सर्व २४ प्रशासकीय विभागांमध्ये जनजागृतीपर प्रदर्शनांचे आयोजन करण्यात येणार आहे. कुष्ठरोग झाला तर लपविण्याऐवजी अगर घाबरून जाण्याऐवजी त्यावर योग्य औषधोपचार तातडीने करवून घ्या. लवकर निदान व योग्य उपचारांनी कुष्ठरोग हा पूर्णपणे बरा होतो. तसेच कुष्ठबाधित व्यक्तींबाबत कोणताही भेदभाव करू नका व इतर कोणी असा भेदभाव करत असेल तर त्यांना त्यापासून परावृत्त करा. या अंतर्गत कुष्ठरोगाबद्दल माहिती देणाऱ्या आरोग्य कर्मचाऱ्यांना सहकार्य करण्याचे आवाहन पालिकेच्या कार्यकारी आरोग्य अधिकारी डॉ. मंगला गोमारे यांनी केले आहे. लक्षणे न खाजणारा, न दुखणारा लालसर किंवा शरीरावरील त्वचेपेक्षा फिकट रंगाचा चट्टा, तेलकट गुळगुळीत लालसर त्वचा, जाड झालेल्या कानाच्या पाळया, कानावरील गाठी, अंगावरील गाठी, विरळ झालेले भुवयांचे केस, हातापायातील बधिरपणा, हातापायाला वारंवार होणाऱ्या जखमा इत्यादी.