मुंबई : मराठी प्रकाशनविश्वातील अग्रणी म्हणून नावलौकिक असलेल्या मौज प्रकाशनगृहाचे संचालक माधवराव भागवत यांचे शनिवारी पहाटे दीड वाजता वृद्धापकाळाने निधन झाले. त्यांच्या पार्थिवावर शनिवारी सकाळी शीव येथील स्मशानभूमीत अंतिम संस्कार करण्यात आले. त्यांच्या पश्चात पत्नी ललिता भागवत, दोन मुले आणि त्यांचा परिवार आहे. गेल्या पन्नास वर्षांहून अधिक काळ प्रकाशन व्यवसायात दर्जेदार साहित्यनिर्मिती करत आपले स्थान टिकवून ठेवणाऱ्या मौज प्रकाशनाचा वारसा पांडुरंग भागवत, दत्तात्रेय भागवत, विष्णुपंत भागवत, श्री. पु. भागवत यांच्यासारख्या विलक्षण प्रभावी संपादकांनंतर माधवराव भागवतांनी यशस्वीपणे सांभाळला. ते प्रामुख्याने मुद्रणतज्ज्ञ होते. मुळातच भागवत कुटुंबीयांचा साहित्य आणि प्रकाशन व्यवसायातील लौकिक मोठा असल्याने माधवरावांचाही साहित्यवर्तुळातील वावर कायम राहिला. प्रयोगशील, सर्जनशील नवे लेखक शोधून त्यांचे साहित्य मौज प्रकाशनाच्या माध्यमातून लोकांसमोर आणण्याची परंपरा त्यांनी कायम ठेवली. उत्कृष्ट संपादन ही ‘मौज’ची खासियतही त्यांनी जपली. मराठी पाठय़पुस्तक प्रकाशन वर्तुळातही त्यांचा वावर होता. मौज प्रकाशनाचा विस्तार आणि लौकिक वाढवण्याचे काम त्यांनी त्यांच्या कार्यकाळात चोख बजावले. वयाची ऐंशी उलटली तरी सतत कार्यशील असलेले माधवराव काही दिवस अंथरुणाला खिळून होते. आदरांजली.. मौज प्रकाशनाच्या लौकिकात माधवरावांचे मोठे योगदान आहे. त्यांच्या अनुभवाचा फायदा इतर प्रकाशकांनाही झाला. - अशोक कोठावळे, मॅजेस्टिक प्रकाशन आमच्यासारख्या प्रकाशकांची पुस्तके माधवराव भागवत यांच्याकडे गेली तरी त्यावर त्यांची बारीक संपादकीय नजर असायची. - येशू पाटील, शब्द प्रकाशन माधवराव भागवत यांनी त्यांच्या प्रेमळ व्यक्तित्त्वामुळे अनेकांना जोडले होते. त्यांचे मार्गदर्शन लाभले नसते तर माझ्यासारख्या प्रकाशकाचे काय झाले असते, असा विचार येतो. - अशोक मुळे, डिंपल प्रकाशन