मुंबई : विधानसभा निवडणुकीचा प्रचार आता कुठे रंगात येऊ लागणार असताना महाविकास आघाडीतील घटक पक्ष असलेल्या कॉंग्रेसच्या कार्यकर्त्यांमध्ये अस्वस्थता आहे. काही ठिकाणी उमेदवारी नाकारल्यामुळे कार्यकर्ते नाराज आहेत. तर अल्पसंख्यांकांची संख्या जास्त मतदारसंघ शिवसेनेच्या (उद्धव ठाकरे) वाट्याला गेल्यामुळे अल्पसंख्यांक इच्छुक उमेदवारही नाराज झाले आहेत.
विधानसभा निवडणुकीसाठी अर्ज भरण्याची मुदत संपुष्टात आल्यानंतर आता प्रत्येक मतदारसंघाचे साधारण चित्र स्पष्ट झाले आहे. त्यामुळे नाराजांची संख्याही वाढली आहे. शीव कोळीवाडा मतदारसंघातून उमेदवारी न मिळाल्यामुळे मुंबई महानगरपालिकेतील माजी विरोधी पक्षनेते रवी राजा यांनी कॉंग्रेसची साथ सोडली. गेली ४४ वर्ष कॉंग्रेसमध्ये असलेल्या रवी राजा यांनी कॉंग्रेसला सोडचिठ्ठी दिल्यामुळे आता कॉंग्रेसमधील नाराज कार्यकर्ते उघडपणे बोलू लागले आहेत. वडाळ्यामधील माजी नगरसेवक सुफीयान वणू यांनी समाज माध्यमांवर ध्वनिचित्रफित टाकून आपली नाराजी व्यक्त केली आहे. महाविकास आघाडीच्या नावाखाली मुंबईतून कॉंग्रेसला हद्दपार करण्याचे षडयंत्र रचले जात असल्याचा आरोप त्यांनी केला आहे. शीव कोळीवाडा मतदारसंघातही अशीच परिस्थिती आहे.
हेही वाचा >>> Sada Sarvankar : “मी माघार घेण्याचा काही प्रश्नच नाही, माहीमधून लढणार आणि…”; सदा सरवणकर यांचं वक्तव्य
रवी राजा यांच्या पक्ष सोडण्यामुळे स्थानिक कार्यकर्त्यांमध्ये नाराजी पसरली आहे, याचा शीव कोळीवाड्यातील निवडणुकीवर परिणाम होऊ नये, म्हणून कार्यकर्त्यांसोबत बैठक घेऊन त्यांचा आत्मविश्वास वाढवण्याचे काम करण्यात येत आहे. निवडणुकीच्या वेळी असे प्रकार घडत असतात. आम्ही कार्यकर्त्यांची नाराजी दूर करण्याचा प्रयत्न करीत आहोत, निवडणुकीपूर्वी स्थानिक नेते आणि कार्यकर्ते एकत्र येऊन निवडणूक लढवतील, असा विश्वास मुंबई कॉंग्रेसचे पदाधिकारी संदीप शुक्ला यांनी व्यक्त केला.
हेही वाचा >>> बंडखोर लढण्यावर ठाम, नेत्यांकडून समजूत काढण्याचे प्रयत्न; जागावाटपाच्या घोळामुळे बंडाळी अटळ
ज्या मतदारसंघात कॉंंग्रेसला जास्त मते मिळत होती, जे मतदारसंघ कॉंग्रेसचे बालेकिल्ला म्हणून ओळखले जात होते, ज्या मतदारसंघात अल्पसंख्यांक मतदार जास्त आहेत असे मतदार संघ शिवसेनेला (उद्धव ठाकरे), राष्ट्रवादी (शरद पवार) यांना सोडले आहेत, एक लाखहून अधिक अल्पसंख्यांक असलेल्या जागा शिवसेनेला जातात, हा योगायोग समजावा का, असा सवाल सुफियान वणू यांनी केला आहे. गोवंडी, अणुशक्तीनगर, वांद्रे पूर्व, कुर्ला, कलिना, भायखळा, वर्सोवा हे मतदारसंघ कॉंग्रेसकडून हिरावले आहेत. या भागात कॉंग्रेसचे जाळे विस्तारू नये असा प्रयत्न यामागे दिसत असल्याचा आरोपही त्यांनी केला आहे. कॉंग्रेस मुंबईत वाढू नये म्हणून सर्व प्रयत्न केले जात आहेत, असाही आरोप त्यांनी केला.
