दहावीच्या जून-जुलै पुरवणी परीक्षेसाठी अर्ज प्रक्रिया सुरू ; २१ मेपर्यंत नियमित शुल्कात संधी

विद्यार्थ्यांना इयत्ता १० वीच्या पुरवणी परीक्षेसाठी आवेदनपत्रे महाराष्ट्र राज्य माध्यमिक व उच्च माध्यमिक शिक्षण मंडळाच्या अधिकृत संकेतस्थळावर ऑनलाईन भरावी लागणार आहे. माध्यमिक शाळांनी विद्यार्थ्यांची शुल्क रक्कम आरटीजीएस/एनईएफटीद्वारे २६ मेपर्यंत भरायची असून, आरटीजीएस/एनईएफटी पावती, विद्यार्थ्यांच्या याद्या आणि प्रिलिस्ट विभागीय मंडळाकडे २९ मेपर्यंत जमा कराव्या लागणार आहेत.

सर्व आवेदनपत्रे ऑनलाईन सबमिट झाल्यानंतर शाळांच्या लॉगिनवर ‘प्रिलिस्ट’ उपलब्ध करून दिली जाईल. संबंधित विद्यार्थ्यांनी त्यातील माहिती जनरल रजिस्टरनुसार पडताळून पाहणे आवश्यक असून, माहिती अचूक असल्याची खात्री करून विद्यार्थ्यांच्या स्वाक्षऱ्या घेण्याच्या सूचना मुख्याध्यापकांना देण्यात आल्या आहेत. तसेच प्रत्येक पानावर मुख्याध्यापकांनी शिक्का व स्वाक्षरी करणे बंधनकारक राहणार आहे. फेब्रुवारी-मार्च २०२६ परीक्षेत अनुत्तीर्ण झालेल्या विद्यार्थ्यांची माहिती ऑनलाईन प्रणालीत उपलब्ध होणार असल्याने त्यांना अर्ज प्रक्रिया सुलभ होणार आहे. याशिवाय श्रेणीसुधार योजनेअंतर्गत उत्तीर्ण विद्यार्थ्यांना जून-जुलै २०२६, फेब्रुवारी-मार्च २०२७ आणि जून-जुलै २०२७ अशा सलग तीन संधी उपलब्ध होणार असल्याचे मंडळाने स्पष्ट केले. ‘कौशल्य सेतू अभियाना’अंतर्गत ट्रान्स्फर ऑफ क्रेडिट घेणाऱ्या विद्यार्थ्यांनाही ऑनलाईन अर्ज करता येणार असून, संबंधित विद्यार्थ्यांना आवश्यक कागदपत्रांसह हार्ड कॉपी विभागीय मंडळात जमा करावी लागणार आहे.

शुल्क भरण्याबाबत मंडळाने विशेष सूचना देताना, अधिकृत संकेतस्थळावरून मिळणाऱ्या ऑनलाईन चलनावरील आयसीआयसीआय बँकेच्या व्हर्च्युअल अकाउंटमध्येच एनईएफटी/आरटीजीएसद्वारे शुल्क जमा करण्याचे निर्देश दिले आहेत. जुन्या बँक चलनांचा वापर करू नये, तसेच मंडळ कार्यालयात रोख रक्कम स्वीकारली जाणार नसल्याचे स्पष्ट करण्यात आले आहे.

निर्धारित मुदतीनंतर नियमित किंवा विलंब शुल्कासाठी कोणतीही मुदतवाढ दिली जाणार नसल्याचा इशाराही मंडळाने दिला आहे. तसेच विहित परीक्षा शुल्क न भरल्यास संबंधित विद्यार्थ्यांना प्रवेशपत्रे उपलब्ध करण्यात येणार नाहीत, असेही स्पष्ट करण्यात आले आहे.