मुंबई : राज्यातील दुष्काळग्रस्त तालुक्यांमधील विद्यार्थ्यांना दिलासा देण्यासाठी फेब्रुवारी – मार्च २०२७ मध्ये होणाऱ्या माध्यमिक शालान्त प्रमाणपत्र (इयत्ता १० वी) व उच्च माध्यमिक प्रमाणपत्र (इयत्ता १२ वी) परीक्षेस बसणाऱ्या विद्यार्थ्यांकडून पुढील आदेश येईपर्यंत परीक्षा शुल्क न घेता ऑनलाईन अर्ज भरून घ्यावेत, अशा सूचना महाराष्ट्र राज्य माध्यमिक व उच्च माध्यमिक शिक्षण मंडळाने सर्व विभागीय मंडळांना दिल्या आहेत.
मदत व पुनर्वसन विभागाच्या २५ सप्टेंबर २०२६ रोजीच्या शासन निर्णयानुसार राज्यातील २६५ तालुक्यांमध्ये दुष्काळजन्य परिस्थिती निर्माण झाल्याने विशेष बाब म्हणून विविध सवलती लागू करण्याचा निर्णय घेण्यात आला आहे. यामध्ये शालेय व महाविद्यालयीन विद्यार्थ्यांच्या परीक्षा शुल्क माफीचाही समावेश आहे.
या पार्श्वभूमीवर राज्य मंडळाने फेब्रुवारी – मार्च २०२७ मध्ये आयोजित करण्यात येणाऱ्या इयत्ता १० वी व इयत्ता १२ वीच्या परीक्षांसाठी दुष्काळग्रस्त तालुक्यांतील विद्यार्थ्यांकडून परीक्षा शुल्क न घेता आवेदनपत्रे भरून घेण्याची कार्यवाही करण्याचे निर्देश दिले आहेत.
या बाबतच्या पुढील सविस्तर सूचना राज्य मंडळाकडून स्वतंत्रपणे जारी करण्यात येणार असून, सर्व विभागीय मंडळांनी आपल्या कार्यक्षेत्रातील दुष्काळग्रस्त तालुक्यांमधील शाळा व कनिष्ठ महाविद्यालयांना तात्काळ सूचना देण्यास सांगितले आहे. तसेच करण्यात आलेल्या कार्यवाहीचा अहवाल राज्य मंडळाकडे तातडीने सादर करण्याचे निर्देशही देण्यात आले आहेत.
नव्याने जाहीर झालेल्या ४३ तालुक्यांनाही सवलत लागू
पहिल्या यादीच जाहीर झालेल्या २६५ तालुक्यांतील विद्यार्थ्यांना ही सवलत लागू आहे. दुष्काळ निवारणासाठीच्या मंत्रिमंडळ उपसमितीच्या बैठकीत मंगळवारी नव्याने ४३ तालुके दुष्काळग्रस्त म्हणून जाहीर केले आहेत. या तालुक्यांचा शासन निर्णय जारी झाल्यानंतर संबंधित शासन निर्णयांनुसार सबंधित तालुक्यांसाठी नव्याने निर्देश दिले जातील, असे शालेय शिक्षण विभागाकडून सांगण्यात आले.
