एमसीए सीईटी अर्जामध्ये २८ फेब्रुवारीपर्यंत करता येणार ऑनलाईन दुरुस्ती; ५५ हजार विद्यार्थ्यानी केले अर्ज

सीईटी कक्षामार्फत एमसीए व एम. एचएमसीटी या पदव्युत्तर अभ्यासक्रमाच्या सीईटी प्रवेश नोंदणीला ७ जानेवारी २०२६ पासून सुरुवात झाली. नोंदणीची अंतिम तारीख १० फेब्रुवारी होती. त्यानंतर १८ फेब्रुवारीपर्यंत पहिली आणि २३ फेब्रुवारीपर्यंत दुसरी व अंतिम मुदतवाढ देण्यात आली होती. त्यानुसार यंदा एमसीए अभ्यासक्रमाला ५५ हजार ५४२ विद्यार्थ्यांनी, तर एम. एचएमसीटी अभ्यासक्रमासाठी ५५ विद्यार्थ्यांनी नोंदणी प्रक्रिया परीक्षा शुल्क भरून नोंदणी पूर्ण केली. त्यापैकी काही विद्यार्थांकडून अर्ज भरताना अनवधानाने चुका झाल्या असतील तर त्या दुरुस्त करण्याची संधी देण्याचा निर्णय सीईटी कक्षाने घेतला आहे. अर्जामध्ये ऑनलाईन पद्धतीने ही दुरुस्ती करता येणार असून, विद्यार्थ्यांना २६ ते २८ फेब्रुवारी २०२६ दरम्यान ही सुविधा उपलब्ध करण्यात आली आहे. विद्यार्थ्यांनी आपल्या स्वतःच्या लॉगीनमध्ये जाऊन ही दुरुस्ती करावयाची आहे. विद्यार्थ्यांना ऑनलाईन पद्धतीने भरलेल्या अर्जात त्याचे नाव, जन्मतारीख, छायाचित्र, स्वाक्षरी, लिंग यामध्ये दुरुस्ती व बदल करता येणार आहे.

एमसीए अभ्यासक्रमाची प्रवेश परीक्षा ३० मार्च २०२६ रोजी, तर एम. एचएमसीटी अभ्यासक्रमाची प्रवेश परीक्षा २५ मार्च २०२६ रोजी होणार आहे. ही परीक्षा राज्यातील विविध परीक्षा केंद्रांवर संगणकाधारित पद्धतीने ऑनलाईन घेण्यात येणार आहेत.

गतवर्षीच्या तुलनेत नोंदणी घटली

एमसीए सीईटी प्रवेश परीक्षेसाठी गतवर्षी ५६ हजार २५७ विद्यार्थ्यांनी नोंदणी केली होती. गतवर्षीच्या तुलनेत यंदा विद्यार्थ्यांची नोंदणी ७१५ ने कमी झाली. तर एम. एचएमसीटीच्या सीईटी प्रवेश परीक्षेसाठी गतवर्षी ८० विद्यार्थ्यांनी नोंदणी केली होती. २०२५ च्या तुलनेत यावर्षी विद्यार्थ्यांची नोंदणी २५ ने कमी झाली.