पदविका अभ्यासक्रमाला पसंती, तर आयटीआयला अल्प प्रतिसाद; तंत्रनिकेतन पदविकाच्या पहिल्याच फेरीत ५८ हजार, तर आयटीआयच्या दोन फेऱ्यांनंतर ६२ हजार प्रवेश

यंदा राज्यातील ४४२ तंत्रनिकेतनांमधील १ लाख ३७ हजार ६२७ जागांसाठी प्रवेश प्रक्रिया राबविण्यात आली. अंतिम गुणवत्ता यादीत १ लाख ४० हजार ३७१ विद्यार्थ्यांचा समावेश करण्यात आला, तर १ लाख २१ हजार ८३१ विद्यार्थ्यांनी पहिल्या फेरीसाठी पर्याय अर्ज भरले. पहिल्याच फेरीत ८९ हजार ६३१ विद्यार्थ्यांना जागा मिळाल्या असून, त्यापैकी तब्बल ४९ हजार ६७८ विद्यार्थ्यांना त्यांच्या प्रथम पसंतीच्या संस्थेत प्रवेशाची संधी मिळाली. १८ जुलैपर्यंत ५८ हजार ३६५ विद्यार्थ्यांनी प्रवेश निश्चित केला आहे. प्रवेश घेणाऱ्या विद्यार्थ्यांचे प्रमाण हे सुमारे ८७ टक्के आहे.

राज्यातील ४१८ शासकीय आणि ५८६ खासगी अशा एकूण १ हजार ४ आयटीआय संस्थांमधील १ लाख ४५ हजार १२४ जागांसाठी यंदाची प्रवेश प्रक्रिया राबविण्यात आली आहे. आयटीआयच्या आतापर्यंत दोन फेऱ्या पार पडल्या. आयटीआयच्या पहिल्या फेरीत ७८ हजार ४९६ जागांचे वाटप होऊन ४१ हजार ८२५ विद्यार्थ्यांनी प्रवेश घेतला, तर दुसऱ्या फेरीत ४४ हजार ६८० जागांचे वाटप होऊन १९ हजार ७८७ विद्यार्थ्यांनी प्रवेश निश्चित केला. या दोन फेऱ्यांमध्ये ६२ हजार ७६ विद्यार्थ्यांनी प्रवेश निश्चित केला आहे. परिणामी तब्बल ८३ हजार ४८ जागा रिक्त असून एकूण प्रवेशाची टक्केवारी केवळ ४२.७७ टक्क्यांवर आहे. अशा प्रकारे दोन फेऱ्यांनंतरही एकूण प्रवेशाची संख्या डिप्लोमाच्या पहिल्याच फेरीतील प्रवेशाच्या जवळपास राहिली आहे.

उच्च शिक्षणाच्या वाढत्या संधी, पदवी अभ्यासक्रमांकडे विद्यार्थ्यांचा वाढलेला कल, तसेच तंत्रनिकेतन पदविकानंतर थेट पदवी अभ्यासक्रमात प्रवेशाची उपलब्ध असलेली संधी यामुळे पदविका अभ्यासक्रमाकडे विद्यार्थ्यांचा ओढा कायम आहे. दुसरीकडे, आयटीआयमध्ये मोठ्या प्रमाणावर जागा रिक्त राहत असल्याने कौशल्याधारित शिक्षण अधिक आकर्षक करण्याची गरज पुन्हा अधोरेखित झाली आहे.