पडताळणी अभावी शिष्यवृत्तीचे हजारो अर्ज प्रलंबित राहिले ?

विधान परिषदेत  डॉ. मनिषा कायंदे, कृपाल तुमाने,  भाई जगताप,  सतेज पाटील आदींनी या बाबतचा प्रश्न उपस्थित केला होता. त्याला चंद्रकात पाटील यांनी दिलेल्या लेखी उत्तर वरील माहिती देण्यात आली.

चंद्रकांत पाटील यांनी दिलेल्या लेखी उत्तरात म्हटले आहे, उच्च शिक्षण संचालनालयाच्या अंतर्गत राज्य सरकारच्या वतीने चौदा  शिष्यवृत्ती योजना महाडीबीटी पोर्टलद्वारे राबविण्यात येतात. विद्यार्थ्याने संगणकीय प्रणालीवर अर्ज सादर केल्यानंतर संस्थास्तरावर आणि विभागीय सहसंचालक स्तरावर अर्जांची पडताळणी करण्यात येते. पण, अनेक विद्यार्थी शिष्यवृत्तीच्या अर्जासह आवश्यक कागदपत्रे जोडत नाहीत. अर्जाची मूळ कागदपत्रे महाविद्यालयास सादर करीत नाहीत. त्यामुळे अर्जांची पडताळणी करण्यात अडचणी येतात. डिसेंबर २०२५ मध्ये शिष्यवृत्तीचे अर्ज प्रलंबित असल्याची बाब निदर्शनास आल्यावर तातडीने अर्ज पडताळणी सुरू करण्यात आली. त्यानुसार १ लाख ४२ हजार ३८३ एकूण अर्जांपैकी ४९,०५७ अर्जांवर कार्यवाही करण्यात आली.

फेब्रुवारीअखेरच्या महाडीबीटी पोर्टलच्या अहवालानुसार ९३,३२६ अर्ज पडताळणी अभावी प्रलंबित आहेत. त्यात चालू आर्थिक वर्षातील (२०२५-२६) अर्जांची संख्या ८१,७५३ असून, त्यापूर्वीच्या चार वर्षांतील अर्जांची संख्या ११,५७३ इतकी आहे. प्रलंबित अर्जांची वेगाने पडताळणी सुरू आहे. शैक्षणिक वर्ष २०२५ – २६ मध्ये अर्ज केलेल्या विद्यार्थ्यांची एकूण संख्या १ कोटी ९९ हजार ६०० इतकी होती. त्यापैकी ५४,८३६ विद्यार्थ्यांना लाभ देण्यात आला. संस्थास्तरावर ३१,८१४ अर्ज प्रलंबित आहेत. विभागस्तरावर ४९,९३९ अर्ज प्रलंबित आहेत. लाभार्थी विद्यार्थ्यांना ४,६३,७५७ इतकी रक्कम वितरीत करण्यात आली आहे, अशी माहिती पाटील यांनी दिली.