मुंबई : वक्फ बोर्डाचे सदस्य डॉ. मुद्दसर लांबे यांचे दाऊदबरोबर असलेल्या संबंधाच्या संभाषणाची ध्ननिफीत विधानसभेत सादर करीत विरोधी पक्षनेते देवेंद्र फडणवीस यांनी महाविकास आघाडीच्या सरकारमध्ये दाऊदच्या हस्तकांचा भरणा असल्याचा गंभीर आरोप केला. अर्थसंकल्पीय चर्चेच्या भाषणाच्या अखेरीस फडणवीस यांनी वक्फ बोर्डाचे सदस्य डॉ. लांबे आणि मोहमद अरशद खान यांच्यातील संभाषणाची ध्वनिफीतच फडणवीस यांनी सभागृहात सादर केली. या ध्वनिफितीत डॉ. लांबे हे अरशद खान यांना आपले दाऊदशी असलेल्या संबंधांबाबत सारी माहिती देत आहेत. आपले सासरे हे दाऊदचे उजवे हात होते. आपले लग्न दाऊदची बहीण हसीना पारकर हिने जमविले होते. हसीना पारकर व भाऊ इक्बालची पत्नी आपले जवळचे आहेत. जरा काहीही झाले की सारे दाऊदपर्यंत पोहचते, असे डॉ. लांबे सांगत होते. वक्फ बोर्डाचा सदस्य म्हणून आपल्याकडे बरेच अधिकार आहेत. पाहिजे तेवढे पैसे कमावू शकतो. या बोर्डात कामे सुरू कर. अर्धे तुझे तर अर्धे माझे, असे डॉ. लांबे यांचे संभाषण आहे. दाऊदच्या लोकांचीच या सरकारमध्ये नियुक्ती केली जाते का, असा सवाल फडणवीस यांनी केला. त्यावर डॉ. लांबे यांची सरकारने नियुक्ती केली नसून ते निवडणुकीच्या माध्यमातून या बोर्डावर निवडून आल्याचे गृहमंत्री वळसे-पाटील यांनी स्पष्ट केले. डॉ. लांबे हे राष्ट्रवादीचे कार्यकर्ते आहेत. त्यांनी गेल्या वेळी मुंबई महानगरपालिकेची निवडणूक राष्ट्रवादीच्या वतीने माहीममधून लढविली होती.