अभिनेत्री माधवी गोगटे यांचे करोनाने निधन

काही दिवसांपूर्वी त्या ही मालिका सोडणार असल्याची बातमी समोर आली होती.

मुंबई : ज्येष्ठ अभिनेत्री माधवी गोगटे यांचे शनिवारी दुपारी कोरोनामुळे निधन झाले. त्या ५८ वर्षांच्या होत्या. त्यांनी अनेक हिंदी तसेच मराठी मालिकांमध्ये प्रमुख तसेच साहाय्यक भूमिका केल्या होत्या. अनेक हिंदी, मराठी चित्रपटांमध्येही त्यांनी काम केले आहे.

अभिनेते प्रशांत दामले यांच्यासह ‘गेला माधव कुणीकडे’ तसेच ‘अंदाज आपला आपला’, ‘भ्रमाचा भोपळा’ ही त्यांची काही गाजलेली नाटके. सध्या त्यांची ‘सिंदुर की कीमत’ ही हिंदूी मालिका ‘दंगल टीव्ही’वर सुरू होती. काही दिवसांपूर्वी त्या ही मालिका सोडणार असल्याची बातमी समोर आली होती. तत्पूर्वी ‘स्टार प्लस’ या वाहिनीवर सध्या गाजत असलेल्या ‘अनुपमा’ या मालिकेशीही त्या जोडल्या गेल्या होत्या. या मालिकेत अनुपमा या नायिकेच्या आईचे पात्र त्यांनी साकारले होते. ‘झी टीव्ही’वरील ‘राजा बेटा’, ‘सपने सुहाने लडकपन के’ तर ‘स्टार भारत’वरील कालभैरव या गाजलेल्या हिंदी मालिकांतून त्यांनी भूमिका साकारल्या होत्या. त्याचबरोबर ‘कहीं तो होगा’, ‘मिसेस तेंडुलकर’, ‘कोई अपना सा’, ‘एक सफर’, ‘बसेरा’, ‘ऐसा कभी सोचा न था’ या त्यांच्या हिंदी मालिका विशेष गाजल्या. ‘स्टार प्रवाह’वरील ‘स्वप्नांच्या पलीकडले’, ‘झी युवा’ वाहिनीवरील ‘तुझं माझं जमतंय’ अशा मराठी मालिकांतून त्या प्रेक्षकांसमोर आल्या होत्या. ‘डोक्याला ताप नाही’, ज्येष्ठ अभिनेते अशोक सराफ यांच्यासोबत ‘घनचक्कर’, ‘हे खेळ नशिबाचे’ अशा मराठी चित्रपटांमध्येही त्यांनी भूमिका केल्या आहेत. त्यांच्या पश्चात पती आणि विवाहित कन्या आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व मुंबई बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Marathi actress madhavi gogate passes away at 58 due to covid complications zws

Next Story
VIDEO: अस्वच्छ खोली १५ मिनिटांत चकाचक