वैद्यकीय प्रवेश अर्जातील चुका सुधारण्याची विद्यार्थ्यांना संधी; ‘एमसीसी’कडून १२ ऑगस्टपर्यंत दुरुस्तीचा पर्याय उपलब्ध

वैद्यकीय अभ्यासक्रमाची पहिली फेरी ५ ते २२ ऑगस्टदरम्यान राबविण्यात येणार आहे. त्यानुसार ५ ते १२ ऑगस्टदरम्यान विद्यार्थ्यांना ऑनलाईन नोंदणी आणि शुल्क भरायचे आहे. मात्र ऑनलाईन अर्ज नोंदणी करताना अनेक विद्यार्थ्यांकडून अनवधानाने चुकीची माहिती भरली जाते. यामुळे त्यांना पुढील प्रक्रियेमध्ये अडचणींचा सामना करावा लागतो. काही विद्यार्थ्यांना प्रवेश प्रक्रियेतून बाहेर पडावे लागते.

विद्यार्थ्यांचे शैक्षणिक हित लक्षात घेऊन राष्ट्रीय आयुर्विज्ञान आयोगाच्या वैद्यकीय समुपदेशन समितीने विद्यार्थ्यांना अर्जात दुरुस्ती करण्यासाठी लॉगिनमध्ये नोंदणी दुरुस्तीचा पर्याय उपलब्ध करून देण्याचा निर्णय घेतला आहे. या निर्णयामुळे अनवधानाने चुकीची माहिती भरलेल्या विद्यार्थ्यांना ‘नोंदणी दुरुस्ती’चा पर्याय एमसीसीकडून उपलब्ध करण्यात आला आहे. या पर्यायाचा वापर करून १२ ऑगस्टपर्यंत सकाळी ११ पर्यंत विद्यार्थी आपल्या नोंदणीच्या तपशीलामध्ये सुधारणा करू शकतात. त्यामुळे विद्यार्थ्यांनी या पर्यायाचा वापर करून दिलेल्या मुदतीपूर्वी नोंदणी अर्जात आवश्यक बदल करून प्रक्रिया पूर्ण करावी, असे आवाहन एमसीसीकडून करण्यात आले आहे. प्रवेश प्रक्रियेतील सविस्तर माहितीसाठी विद्यार्थ्यांनी http://www.mcc.nic.in या अधिकृत संकेतस्थळाला नियमित भेट देण्याचा सल्ला एमसीसीकडून देण्यात आला आहे.

वैद्यकीय प्रवेश प्रक्रियेचे वेळापत्रक

वैद्यकीय अभ्यासक्रमाच्या समुपदेशानाची पहिली फेरी ५ ते २२ ऑगस्टदरम्यान राबविण्यात येणार आहे. ५ ते १२ ऑगस्टदरम्यान विद्यार्थ्यांना ऑनलाईन नोंदणी, आणि शुल्क भरायचे आहे. ६ ते १३ ऑगस्ट या कालावधीत पसंतीक्रम भरून अर्ज निश्चित करायचा आहे. १७ ऑगस्ट रोजी गुणवत्ता यादी जाहीर करण्यात येणार आहे. १८ ते २२ ऑगस्ट या कालावधीत विद्यार्थ्यांना प्रत्यक्ष महाविद्यालयात जाऊन प्रवेश घ्यायचा आहे.