विद्यार्थ्यांसाठी खूषखबर… मेट्रो ३ मधून प्रवास करणाऱ्या विद्यार्थ्यांना मिळणार ‘ही’ सवलत…

तसेच पर्यटकांसह सर्वसामान्यांसाठी एका दिवसाच्या पासचीही सुविधा उपलब्ध करण्यात आली आहे. एमएमआरसी २८० रुपये आणि ७०० रुपयांचा एकदिवसीय पास उपलब्ध करणार असून पर्यटकांना या पासवर दिवसभरात अमर्याद प्रवास करता येणार आहे.

अपंगांना २५ टक्के सवलत

मुंबईतील पहिली ३३.५ किमीची भुयारी मेट्रो मार्गिका ऑक्टोबर २०२५ पासून पूर्ण क्षमतेने धावू लागली आहे. आरे – कफ परेडदरम्यान मेट्रोने अतिजलद प्रवास करता येत असल्याने या मार्गिकेला चांगला प्रतिसाद मिळत आहे. मेट्रो ३ प्रवाससाठी १० ते ७० रुपयांदरम्यान तिकीट दर आहेत.

या मार्गिकेवरील प्रवाशांच्या सोयीसाठी एमएमआरसीकडून विविध सोयी-सुविधा उपलब्ध करण्यात येत आहेत. त्याचाच एक भाग म्हणून तिकिट दरात सवलत देण्यात येत आहे. त्यानुसार नियमित ४५ फेऱ्यांच्या मासिक पासवर सर्व प्रवाशांना १० टक्के, तर ६० फेऱ्यांच्या मासिक पासवर १५ टक्के सवलत देण्यात येत आहे.

तर अपंगांना ४५ फेऱ्यांच्या आणि ६० फेऱ्यांच्या मासिक पासवर २५ टक्के सवलत लागू आहे. ही सवलत लागू असताना एमएमआरसीने १२ वीपर्यंतच्या विद्यार्थ्यांना आता २५ टक्के सवलत देण्याचा निर्णय घेतला आहे. ही योजना बुधवारपासून लागू करण्यात आली आहे. २८३५ रुपयांच्या ४५ फेऱ्यांच्या मासिक पासवर विद्यार्थ्यांना २५ टक्के सवलत मिळत असून ही बाब विद्यार्थ्यांसाठी-पालकांसाठी दिलासादायक आहे.

मेट्रो कनेक्ट-३ ॲपवरून घेता येणार सवलतीचा लाभ

विद्यार्थ्यांना मासिक पासमध्ये २५ टक्क्यांची सवलत देतानाच एमएमआरसीने पर्यटकांसाठी एकदिवसीय पासचीही सुविधा बुधवारपासून उपलब्ध करून दिली आहे. त्यानुसार २८० रुपयांचा एक दिवसीय पास उपलब्ध करण्यात आला असून या पासद्वारे एका दिवसात अमर्याद प्रवास करता येणार आहे. तर दुसरा पास ७०० रुपयांचा असणार असून या पासद्वारे पर्यटकांना तीन दिवस अमर्याद प्रवास करता येणार आहे. दरम्यान, ही सुविधा प्रवासी, पर्यटक आणि विद्यार्थ्यांना मेट्रो कनेक्ट ३ ॲप आणि एनसीएमसी कार्डच्या माध्यमातून उपलब्ध होणार आहे.