मुंबई : म्हाडाने ‘मुंबई महानगर प्रदेश (एमएमआर) ग्रोथ हब’अंतर्गत मुंबई आणि एमएमआरमध्ये वृद्धाश्रम, तसेच नोकरदार महिलांसाठी वसतीगृह बांधण्याचा निर्णय घेतला आहे. म्हाडा एमएमआरमधील पहिला वृद्धाश्रम आणि नोकरदार महिलांसाठी वसतीगृह ठाण्यात बांधणार आहे. ठाण्यातील माजीवाडा येथील एक जागा यासाठी निश्चित करण्यात आली असून एकाच भूखंडावर बाजूबाजूला वृद्धाश्रम आणि वसतीगृह बांधण्यात येणार आहे.
‘एमएमआर ग्रोथ हबम’ध्ये आठ लाख घरांची निर्मिती करण्यासाठी म्हाडाने सविस्तर आराखडा तयार केला आहे. या आराखड्यानुसार सर्वसामान्यांसाठी परवडणारी घरे बांधतानाच समाजातील इतर घटकांना हक्काचा निवारा उपलब्ध करण्याची एक वेगळी संकल्पना म्हाडाने पुढे आणली आहे. त्यानुसार निराधार वृद्धांसाठी वृद्धाश्रम, तसेच नोकरदार महिलांना सुरक्षित निवारा उपलब्ध करण्यासाठी वसतीगृह बांधण्यात येणार आहे. त्याचाच एक भाग म्हणून मुंबई मंडळ मुंबईत तीन वृद्धाश्रम आणि नोकरदार महिलांसाठी सात वसतिगृहे बांधणार आहे. तर, कोकण मंडळ मुंबई महानगर प्रदेशात (एमएमआर) दोन वृद्धाश्रम आणि नोकरदार महिलांसाठी सहा वसतिगृहे बांधणार आहे. यासंबंधीचा निर्णय झाल्यानंतर कोकण मंडळाने पहिल्या वृद्धाश्रमासह वसतीगृहासाठी जागा निश्चित केल्याची माहिती मंडळातील वरिष्ठ अधिकाऱ्याने दिली.
हेही वाचा >>>मालाडमध्ये गुरुवारी पाणीपुरवठा बंद; पाणी जपून वापरण्याचे महापालिकेचे आवाहन
ठाण्यातील माजीवाडा येथे एमएमआरमधील पहिले वृद्धाश्रम आणि नोकरदार महिलांसाठी वसतीगृह बांधण्यात येणार आहे. एकाच भूखंडावर वृद्धाश्रम आणि वसतीगृहाच्या स्वतंत्र इमारती बाधण्यात येणार आहेत. सात मजली वृद्धाश्रम आणि वसतीगृह बांधण्यासंबंधीचा प्रस्ताव मंडळाने तयार केला आहे. हा प्रस्ताव लवकरच म्हाडा उपाध्यक्षांसमोर मंजुरीसाठी ठेवण्यात येणार आहे.
