मिठी नदी गाळ उपसा घोटाळ्यात आदित्य ठाकरेंची चौकशी करा; शिवसेना प्रवक्त्या शीतल म्हात्रे यांचे आदित्य ठाकरेंवर गंभीर आरोप

म्हात्रे म्हणाल्या की दिनो मोरियाची अटक हे मिठी नदी गाळ उपसा घोटाळ्यातील हिमनगाचे टोक आहे. या घोटाळ्यात दिनो मोरियाचा मित्र आदित्य ठाकरे याचा थेट संबंध आहे. मोरिया आणि आदित्य खास मित्र आहेत हे सर्वश्रुत आहे.

महापालिकेत नगरसेवक असताना दिनो मोरिया पालिकेत वारंवार यायचे. दिनो मोरिया आणि कंत्राटदार केतन कदम पार्टनर असल्याचे,संभाषणातून सिद्ध झाले असल्याचा आरोप म्हात्रे यांनी केला. दिनो मोरिया आणि आदित्य ठाकरे यांची प्रत्येक कंत्राटामध्ये कमिशन घेणारी वसुली गँग आहे असा खळबळजनक आरोप म्हात्रे यांनी केला. कोविडकाळातील खिचडी घोटाळा, बॉडी बॅग घोटाळा, कोविड सेंटर घोटाळा, ऑक्सिजन प्लॅन्ट अशा कॉन्ट्रॅक्टची सखोल चौकशी होऊन श्वेत पत्रिका काढावी अशी मागणी म्हात्रे यांनी मुंबई महापालिका आयुक्तांकडे केली.

त्या पुढे म्हणाल्या की दिशा सालियन हत्येप्रकरणातही दिनो मोरिया याचे नाव आहे. मिठी नदी घोटाळा असो किंवा दिशा सालियन हत्याकांड असो दिनो मोरिया याचे नाव पुढे येत आहे. त्यामुळे दिनो मोरिया याच्या मोबाईल मधील चॅट आणि कॉल डेटा जनतेसमोर यायला हवा. यातून अनेक गोष्टींचा उलगडा होईल.

दिनो मोरियाची ज्या प्रकारे चौकशी सुरू आहे त्याच प्रकारे आदित्य ठाकरेची आर्थिक गुन्हे शाखेने चौकशी करावी अशी मागणी म्हात्रे यांनी मुंबई पोलीस आयुक्तांकडे केली. यासंदर्भात शिवसेनेकडून मुंबई पोलीस आयुक्तांना पत्र दिले जाईल, असे म्हात्रे म्हणाल्या. ठाण्यातील प्रदीप पुर्णेकर हत्येचा पोलीस तपास करत आहेत. तपासातून सत्य समोर येईल असेही त्या म्हणाल्या.

दरम्यान, ऑगस्ट २०२४ मध्ये मिठी नदी गाळ काढण्याच्या कामात घोटाळा झाल्याचा आरोप करून भाजप आमदार प्रसाद लाड आणि प्रविण दरेकर यांनी विधान परिषदेत या प्रकरणी चौकशीची मागणी केली होती. आर्थिक गुन्हे शाखेच्या विशेष तपास पथकाने मिठी नदीचा गाळ काढण्याच्या प्रकल्पातील कथित अनियमितता आणि निधीच्या कथित गैरवापराबाबत चौकशी सुरु केली होती.

नदीच्या उगमस्थळापासून पवई ते कुर्ला या ११ किमी ८४० मीटरच्या सफाईची जबाबदारी महापालिका व उर्वरित ६ किमी ८०० मीटरची जबाबदारी एमएमआरडीएकडे आहे. पोलिसांच्या चौकशीत या संपूर्ण कामांसाठी एकूण १८ कंत्राटदार आतापर्यंत नेमण्यात आल्याचे निष्पन्न झाले आहे.