प्रभादेवी पुलाचे काम एप्रिलपर्यंत पूर्ण करा एमएमआरडीएचे महारेलला निर्देश

दक्षिण मुंबईतून अटल सेतूवर थेट जाता यावे यासाठी एमएमआरडीए ४.५ किमी लांबीचा आणि १७ मीटर रुंदीचा शिवडी-वरळी उन्नत रस्ता बांधत आहे. हा उन्नत रस्ता मध्य आणि पश्चिम रेल्वे मार्गावरील १२५ वर्षांहून अधिक जुन्या प्रभादेवी पुलावरून जात आहे. मात्र हा पूल धोकादायक झाल्याने या पुलाची पुनर्बांधणी करणे आवश्यक होते. या पुलाच्या पुनर्बांधणीची जबाबदारी एमएमआरडीएने घेतली. त्यानुसार दुमजली पुलाची आखणी केली. जुन्या पुलाचे पाडकाम करून नवीन दुमजली पुलाच्या कामाला सुरुवात करण्याचे नियोजन केले. मात्र विस्थापनाचा प्रश्न गंभीर बनला आणि पाडकाम, पुनर्बांधणी लांबणीवर पडली. परिणामी शिवडी – वरळी उन्नत रस्ता प्रकल्प रखडला. पण अखेर विस्थापनाचा प्रश्न मार्गी लावण्यात एमएमआरडीएला यश आले. दोन इमारतींमधील रहिवाशांना म्हाडाची घरे देण्याची प्रक्रिया सुरू झाली. तर त्याआधीच पुलाचे पाडकामही सुरू झाले. दरम्यान, रेल्वेच्या हद्दीतील पुलाचे पाडकाम आणि पुनर्बांधणी करण्याची जबाबदारी महारेलकडे आहे. तर उर्वरित काम एमएमआरडीए करत आहे. असे असताना महारेलच्या हद्दीतील काम मात्र रखडल्याचे चित्र आहे.

महारेलच्या हद्दीतील १३२ मीटर लांबीच्या पुलाचे काम लांबणीवर पडले, तर उन्नत रस्ता सप्टेंबरपर्यंत पूर्ण करून वाहतूक सेवेत दाखल करणे एमएमआरडीएसाठी शक्य होणार नाही. त्यामुळे आता एमएमआरडीएने रेल्वेच्या हद्दीतील काम एप्रिलपर्यंत पूर्ण करून पूल हस्तांतरित करण्याचे निर्देश महारेलला दिल्याची माहिती सूत्रांनी दिली. ब्लॉक घेण्यावरून, वे-लिव्हसह इतर विभागीय शुल्कावरून महारेल आणि रेल्वेमध्ये वाद सुरू आहे. हा वाद मिटत नसल्याने पुलाचे काम मार्गी लागत नसल्याचे चित्र आहे. त्यामुळे जे काही वाद आहेत ते मिटवा आणि एप्रिलपर्यंत काम पूर्ण करण्यास एमएमआरडीएने सांगितले आहे. तेव्हा आता महारेलकडून वाद मिटवून कामास वेग दिला जातो का, हे पाहणे महत्त्वाचे असणार आहे. दरम्यान, याविषयी महारेलशी संपर्क साधण्याचा प्रयत्न केला, मात्र त्यांच्याशी संपर्क होऊ शकला नाही.