मुंबईतील पहिल्या मेट्रो मार्गिकेचा बारा वर्षांचा प्रवास

११.४ किमीची आणि १४ स्थानकांचा समावेश असलेली मेट्रो १ मार्गिका ८ जून २०१४ रोजी वाहतूक सेवेत दाखल झाली. मुंबईत पहिल्यांदा मेट्रो धावली आणि मुंबईकरांचा मेट्रो प्रवास सुरू झाला. सुरुवातीला या मार्गिकेला म्हणावा तसा प्रतिसाद मिळाला नाही. मात्र हळूहळू या मार्गिकेकडे प्रवासी वळू लागले आणि आज या मार्गिकेवरून दिवसाला अंदाजे पावणेसहा लाखांहून अधिक प्रवासी प्रवास करतात. प्रवाशांची संख्या इतकी आहे की, गर्दीच्या वेळेस चार डब्यांची मेट्रो गाडी अपुरी पडत आहे. त्यामुळे या मार्गिकेवर सहा डब्यांची मेट्रो गाडी सुरू करण्याची मागणी प्रवाशांकडून होत आहे. या मार्गिकेच्या संचालन आणि देखभालीची जबाबदारी असलेल्या मुंबई मेट्रो वन प्रायव्हेट लिमिटेड (एमएमओपीएल)कडून सहा डब्यांची मेट्रो सुरू करण्याच्या दृष्टीने प्रयत्न सुरू आहेत. मात्र आर्थिक अडचणींमुळे सहा डब्यांची मेट्रो प्रत्यक्षात उतरत नसल्याचे चित्र आहे.

मेट्रो १ मार्गिका सेवेत दाखल होऊन रविवारी १२ वर्षे पूर्ण होत आहेत. या १२ वर्षांत या मार्गिकेवरून १५ लाख फेऱ्या धावल्या असून यातून १२५ कोटी प्रवाशांनी प्रवास केला आहे. या काळात मेट्रो १ चा ९९.९९ टक्के वक्तशीरपणा राहिला आहे. तर मार्गिकेवर छोट्या-मोठ्या दुर्घटना घडल्या आहेत, मात्र एकही अपघाती मृत्यू झालेला नाही. या मार्गिकेला प्रवाशांचा चांगला प्रतिसाद मिळत असून प्रवाशांच्या सुविधेसाठी एमएमओपीएलने १२ व्या वर्धापनदिनानिमित्त प्रवाशांसाठी राष्ट्रीय कॉमन मोबिलिटी कार्ड (एनसीएमसी) सुविधा उपलब्ध करून दिली आहे. तसेच ऑन द गो कार्डचीही सुविधा उपलब्ध करून दिली आहे. या सुविधेअंतर्गत प्रवाशांना मेट्रो १ मार्गिकेसह मेट्रो २अ (दहिसर ते अंधेरी पश्चिम), मेट्रो ७ (दहिसर ते गुंदवली), मेट्रो ३ (आरे ते कफ परेड), बेस्ट बस आणि मोनोरेलचा प्रवासही करता येणार आहे.