मुंबई मेट्रोची धाव आता- कल्याण- उल्हासगरपर्यंत; १८ हजार कोटी रुपयांच्या सुधारित आराखड्यास मान्यता

ठाणे- भिवंडी-कल्याण मुंबई मेट्रो मार्ग-५ या उन्नत मेट्रो मार्गाची उभारणी मुंबई महानगर प्रदेश विकास प्राधिकरणामार्फत करण्यात येत आहे. सुमारे ८ हजार ४०० कोटी रुपये खर्चाच्या आणि २४.९ किलोमीटर लांबीच्या या मेट्रो मार्गावर १७ उन्नत स्थानकांचा समावेश होता. या प्रकल्पाच्या टप्पा-१ मध्ये (ठाणे ते भिवंडी) मध्ये पुनर्वसन व पुनर्वसाहत संबंधी विशेष समस्या नसल्यामुळे या मेट्रो मार्गाचे काम अंतिम टप्यात आहे. तथापि, सदर प्रकल्पाच्या टप्पा-२ (भिवंडी ते कल्याण) मध्ये मोठ्या प्रमाणात पुनर्वसन व पुनर्वसाहत संबंधी समस्या असल्यामुळे पूर्वीचा मेट्रोमार्गात सुधारणा करुन दुर्गाडी ते कल्याण या उन्नत मार्गिकेचे भुमिगत मार्गिकेमध्ये रुपांतर करण्याचा निर्णय घेण्यात आला होता.

त्यामुळे सदर प्रकल्पाच्या मूळ किंमतीमध्ये १४२७ कोटीची वाढ होवून या मेट्रो प्रकल्पाची किंमत ९ हजार ८४३ कोटींच्या घरात गेली होती. मात्र काही महिन्यांपूर्वी मुख्यमंत्री देवेंद्र फडणवीस यांनी या प्रकल्पात सुधारणा करण्याचे आदेश दिले होते. भिवंडी शहरातील सध्याची एकंदर वाहतूक परिस्थिती लक्षात घेता, अस्तित्वातील उड्डाणपूल पाडून त्याठिकाणी उड्डाणपूल अधिर मेट्रो मर्गीका बांधण्यास लागणारा विलंब लक्षात घेता याकाळात भिवंडी शहरातील वाहतूक व्यवस्था कोलमडून पडेल अशी भिती व्यक्त करण्यात आल्याने फडणवीस यांनी या प्रकल्पात सुधारणा करण्याचे आदेश दिले होते. त्यानुसार भिवंडी शहरातील धामणकर नाका ते टेमघर या भागात अंशत भूमिगत मेट्रो तसेच, रांजनोली जंक्शन ते दुर्गाडी चौक दरम्यान द्विस्तरीय एकत्रित संरचनेत (उड्डाणपूलासह) उन्नत मेट्रोचे बांधकाम करण्याचा निर्णय घेण्यात आला आहे.

यामुळे ठाण्यातील कापूरबावडी येथून सुरु होणारी मेट्रो-५ ठाणे भिवंडी रस्त्याने भिवंडी शहरात राजीव गांधी चौक, भिवंडी येथून कल्याण रोड मार्गे राजनोली ते दुर्गाडी पर्यंत व त्यापुढे कल्याण शहरातून कल्याण शीळरोड मार्ग कल्याण बाजार समिती पर्यंत प्रस्तावित होती. आता या प्रकल्पात सुधारणा करण्यात आली असून सुधारीत सविस्तर प्रकल्प अहवालामध्ये मुंबई मेट्रो मार्ग ५ (ठाणे-भिवंडी कल्याण) च्या मार्गाच्या संरेखनामध्ये बदल करुन दुर्गाडी चौक ते कल्याण बाजार समिती मेट्रो स्थानकापर्यंत जाणारा मेट्रो मार्ग-५ चा मार्ग दुर्गाडी मेट्रो स्थानकावर समाप्त करण्याचा तर मेट्रो मार्ग ५ अ दुर्गाडी स्थानकापासून सुरुवात करण्याचे प्रस्तावित केले आहे. म्हणजेच मेट्रो मार्ग ५ चा भाग असलेला दुर्गाडी ते कल्याण बाजार समिती मेट्रो स्थानकापर्यंत (जुना मुंबई-आग्रा मार्ग) मार्ग वगळून आता मुंबई मेट्रो-५अ (दुर्गाडी-आधारवाडी-खडकपाडा-कल्याण) व मेट्रो मार्ग ५ चा विस्तार भोईरवाडी ते उल्हासनगर असा करण्याचा निर्णय घेण्यात आला आहे. त्यामुळे मुंबई मेट्रो थेट उल्हासनगर पर्यंत धावणार आहे.