Mumbai Metro Line 3 Delay : मेट्रो ३ मार्गिकेवर वाहतुकीचा खोळंबा; तांत्रिक कारणामुळे सिद्धीविनायक स्थानकावर गाडी बंद पडली

मेट्रो ३ मार्गिकेमुळे मुंबईकरांचा आरे ते कफ परेड प्रवास अतिजलद आणि सुकर झाला आहे. त्यामुळे मेट्रो ३ मार्गिकेला प्रवाशांचा प्रतिसाद वाढत आहे. सकाळी आणि सायंकाळी कार्यालयीन वेळेत मेट्रो ३ मार्गिकेवर प्रवाशांची मोठी गर्दी असते. अशावेळी मंगळवारी आरे जेव्हीएलआरवरुन कफ परेडला निघालेली मेट्रो गाडी ऐन गर्दीच्या वेळेस सकाळी १० च्या सुमारास सिद्धीविनायक मेट्रो स्थानकावर पोहचली आणि गाडी अचानक बंद पडली. गाडी पुढे जाईना.

गाडीत तांत्रिक बिघाड झाल्याचे लक्षात आल्याबरोबर एमएमआरसीच्या अधिकारी-कर्मचार्यांनी गाडीतील तांत्रिक बिघाड दूर केला आणि त्यानंतर गाडी कफ परेडच्या दिशेने मार्गस्थ झाली. मात्र यात १० मिनिटांचा अवधी गेल्याची माहिती एमएमआरसीकडून देण्यात आली आहे. गाडी १० मिनिटे सिद्धिविनायक स्थानकावर थांबल्याने आरे जेव्हीएलआर ते कफ परेड डाऊन मार्गावरील गाड्यांचा खोळंब झाला. पुढे काही वेळ गाड्या ५ ते १० मिनिटे उशिरा धावत होत्या, मात्र त्यानंतर दुपारी वाहतूक सुरळीत झाली असून आता गाड्या वेळापत्रकानुसार धावत असल्याचे एमएमआरसीकडून सांगण्यात आले आहे.

आॅक्टोबरमध्ये आरे जेव्हीएलआरवरुन आचार्य अत्रे चौक मेट्रो स्थानकाकडे जाणार्या गाडीला दुपारी २.४४ वाजता अचानक सांताक्रुझ मेट्रो स्थानकावर थांबवावे लागले होते. गाडीतून अचानक ठिगण्या उडू लागल्याने, धूर आणि जळल्यासारखा वास येऊ लागल्याने प्रवासी घाबरले आणि एकच गोंधळ त्यावेळी उडाला होता. त्यामुळे सांताक्रुझ मेट्रो स्थानकावर गाडी थांबवून प्रवाशांना बाहेर काढत गाडी तांत्रिक तपासणीसाठी बीकेसीतील लूपलाईनवर नेण्यात आली होती. तर मंगळवारी सकाळी गाडी तांत्रिक बिघाडामुळे बंद पडल्याने प्रवाशांची मोठी गैरसोय झाली.