कोण होणार महापौर… भाजपच्या दोन अनुभवी नगरसेविकांमध्ये चुरस

स्थानिक स्वराज्य संस्थांमध्ये महिलांसाठी पन्नास टक्के आरक्षण असले तरी मुंबई महापालिकेत पन्नास टक्क्यांपेक्षा अधिक महिला नगरसेवक निवडून येण्याची परंपरा यंदाही कायम आहे. यंदा मुंबई महापालिकेवर तब्बल १३० नगरसेविका निवडून आल्या आहेत. एकूण २२७ प्रभागांपैकी ११४ प्रभाग महिलांसाठी राखीव असताना यंदा १३० महिला निवडून आल्या आहेत. मुंबई महापालिकेत यंदा निवडून आलेल्या नगरसेविकांमध्ये सर्वाधिक नगरसेविका या भाजपच्या आहेत. त्याखालोखाल शिवसेना (ठाकरे), शिवसेना (शिंदे) यांचे उमेदवार आहेत. भाजपच्या ४९ नगरसेविका निवडून आल्या आहेत. महापौर पद हे महिला सर्वसाधारण प्रवर्गासाठी राखीव असल्यामुळे या सगळ्या ४९ महिला नगरसेविका महापौर पदासाठी पात्र आहेत. मात्र अनुभव आणि महापौर पदाचा चेहरा या दृष्टीने गेल्या काही दिवसांपासून तीन – चार नावे चर्चेत आहेत. ही सगळी नावे आता मागे पडली असून आता केवळ दोन नावांमध्येच प्रमुख चुरस सुरू आहे.

महापौर पदासाठी आतापर्यंत तेजस्वी घोसाळकर, अलका केरकर, हर्षिता नार्वेकर, योगिता कोळी, जेश्री शिरवडकर, रितू तावडे, शीतल गंभीर, प्रीती सातम यांची नावे चर्चेत होती. मात्र बाकीची नावे मागे पडली असून सध्या राजेश्री शिरवडकर आणि रितू तावडे यांच्यात चुरस आहे. राजेश्री शिरवडकर या शीव कोळीवाडा मतदारसंघातील नगरसेविका आहेत. तर रितू तावडे या घाटकोपरमधील नगरसेविका आहेत. या दोघी नगरसेविका अनुभवी असून त्यांनी समित्यांचे अध्यक्षपदही भूषवले आहे. त्यामुळे त्यांच्या नावात चुरस आहे.

भाजपच्या गटनेतेपदी गणेश खणकर यांची नियुक्ती झाली असून ते पश्चिम उपनगरातील आहेत. तर स्थायी समिती अध्यक्ष पदासाठी मुलुंडमधील नगरसेवक प्रभाकर शिंदे यांच्या नावाची चर्चा आहे. त्यामुळे महापौर पद हे शहर भागातील नगरसेविकेला मिळू शकते अशीही चर्चा सुरू आहे. त्यामुळे राजेश्री शिरवडकर यांचे नाव अग्रस्थानी आहे. राजेश्री यांचे पती राजेश शिरवडकर हे भाजप मुंबईचे सरचिटणीसही आहेत.