मुंबईत मुस्लीम मतदाराचा यु -टर्न : समाजवादीला झोपवले, ‘एमआयएम’हात; ठाकरे शिवसेना आणि अजित पवारांची राष्ट्रवादी बसली हात चोळत

अबु आझमी यांच्या मानखुर्द -शिवाजीनगर मतदारसंघात एमआयएमने बहुतांश जागा जिंकल्या आहेत. येथे ओवेसी बंधूंच्या दोन सभा झाल्या होत्या. त्याला मोठा प्रतिसाद मिळाला होता. निवडणुकीच्या तोंडावर समाजवादी पक्षामध्ये अबु आझमी आणि आमदार रईस शेख या दोन नेत्यांमध्ये जुंपली होती. उत्तर भारतीय मुस्लीम आणि मराठी मुस्लीम अशी त्या संघर्षाला किनार होती. त्यातून पक्षाध्यक्ष अखिलेश यादव यांचा मुंबई दौरा रद्द करण्यात आला होता. चौथ्यांदा आमदार बनलेल्या अबु आझमी यांच्या विरोधात मोठी नाराजी होती. त्याचा लाभ एमआयएमला झाला.

उपमुख्यमंत्री अजित पवार यांच्या राष्ट्रवादीने मुंबईत तब्बल २३ मुस्लीत उमेदवार उभे केले होते. तसेच निवडणुकीचे नेतृत्व पक्षाचे नेते नवाब मालिक यांच्या हाती दिले होते. मात्र याचा काही लाभ राष्ट्रवादीला झाला नाही. मलिक यांच्या घरातील दोन महिला विजयी झाल्या मुंबईत अनेक ठिकाणी एमआयएमचे उमेदवार तिसऱ्या क्रमांकावर आहेत. एमआयएमने मुंबईत मुसंडी मारत आश्चर्याचा धक्का दिला आहे.

२०१७ मध्ये मुंबई महानगरपालिकेत एमआयएमचे २ आणि समाजवादी पक्षाचे ७ नगरसेवक होते. यावळी नेमली उलटी स्थिती झाली. मुंबई महापालिकानिवडणुकीला यावेळी धार्मिक रंग चढला असतानाही सर्वपक्षीय व अपक्ष असे ३३४ मुस्लीम उमेदवार निवडणुकीच्या रिंगणात होते. त्यामध्ये समाजवादीचे ७०, एमआयएमचे ४९, काँग्रेसचे ३३ आणि राष्ट्रवादी अजित पवार गटाचे २३ मुस्लीम उमेदवार मुंबईच्या मैदानात होते.

एमआयएम सरस का?

२०२४ च्या लोकसभा निवडणुकीत मुंबईतील मुस्लीम मतदार उद्धव ठाकरे यांच्या शिवसेनेमागे एकगठ्ठा उभा राहिला होता. यावेळी ते चित्र दिसले नाही. उद्धव ठाकरे यांच्या शिवसेनेने ८ आणि राज ठाकरे यांच्या मनसेने २ मुस्लीम उमेदवार दिले. मात्र मुस्लीम मतदारांनी एमआयएमच्या मागे उभे राहणे पसंत केले. एमआयएमने यावेळी बहुतांश उच्चशिक्षीत उमेदवारांना प्राधान्य दिले होते. त्यामुळे एमआयएमची राज्यात सरस कामगिरी केली.